Qyzylordada 17 adam tótenshe jaǵdaı kezinde toı jasaǵan
QYZYLORDA. QazAqparat - Qyzylorda oblysynda 17 turǵyn tótenshe jaǵdaı kezinde úıinde 50-den astam adam shaqyryp toı jasaǵany úshin jazaǵa tartyldy, dep habarlaıdy QazAqparat tilshisi.
«Tótenshe jaǵdaıǵa baılanysty karantın kezinde ujymdyq, otbasylyq, barlyq jıyndarǵa, kórshi, týǵan-týystarǵa barýǵa tyıym salynǵan. Soǵan qaramastan 17 adam úılerinde sany 50-den asatyn adam jınap toı ótkizgen. Onyń ekeýi Qyzylorda qalasynda tirkelse, aýdandar boıynsha Aralda - 2, Qazalyda - 5, Qarmaqshyda - 3, Jalaǵashta - 1, Shıelide - 2, Jańaqorǵanda - 2 jaǵdaı kezdesti», - dedi oblystyq polıtsııa departamentiniń baspasóz qyzmeti.
Qyzylorda oblysy bas sanıtarlyq dárigeriniń 7 sáýirdegi kezekti №7 qaýlysyna sáıkes, oblys turǵyndary arasynda qaýipsizdik sharalaryn kúsheıtý maqsatynda sáýirdiń 8-nen bastap túngi saǵat 00:00-den bastap turǵyndar men kólik qozǵalysyna shekteý qoıyldy. Alaıda qoıylǵan talapty oryndamaǵan 28 azamat kezdesip, olardyń ruqsatsyz blokposty aınalyp ótkeni anyqtaldy. Bul jaǵdaıdyń 11-i Aralda kezdesse, Qazalyda - 4, Qarmaqshyda - 1, Baıqonyr ókildiginde 12 jaǵdaı tirkeldi.
Eske salsaq, Qyzylorda oblysynda qazir koronavırýs ınfektsııasyn juqtyrǵan qazir 104 adam tirkelgen .
