Qyzylordada 152 adamdy aldap, 90 mln teńgeni qaltasyna basqan áıel sottaldy
QYZYLORDA. QazAqparat - Qyzylorda oblysynda qarjy pıramıdasyn quryp, 152 jábirlenýshiden 90 mln teńgeden astam qarjyny jymqyrǵan alaıaq sottaldy, dep habarlaıdy QazAqparat tilshisi.
1982 jyly dúnıege kelgen áıel 2019 jyldyń tamyz aıynda WhatsApp jelisinde «Aı-shýaq» tobyn ashqan. Bul azamatsha budan buryn da sotty bolǵan, eshqaıda jumys istemegen.
Ol qarjylyq (ınvestıtsııalyq) pıramıda quryp, oǵan basshylyq jasaǵan. Nátıjesinde 152 azamattan 91 mıllıon teńgeden astam qarjyny aldap alǵan.
Topqa qosylǵan birinshi qatysýshylar alǵashqy salymyn 40 paıyz ústemesimen qaıtaryp alǵany anyqtaldy.
Aınalymdaǵy jalpy qarjy 1 mlrd 695 mln 538 myń teńgege deıin jetken. Ýaqyt óte kele pıramıdaǵa qatysýshylar aqshasyn qaıtara almaı qalǵan.
«Bul derek boıynsha QR Qylmystyq kodeksiniń 217-babynyń 3-bóliginiń 2-tarmaǵymen sotqa deıingi tergep-tekserý amaldary júrgizildi. Osy baǵytta Qyzylorda qalalyq polıtsııa basqarmasynyń tergeý bóliminiń tergeýshisi Nurbol Nurmaǵanbet nátıjeli jumystar atqardy. Atalǵan qylmys tolyǵymen dáleldenip, aıyptalýshy Qyzylorda qalalyq sotynyń sheshimimen bes jylǵa bas bostandyǵynan aıyryldy» dep málim etti Qyzylorda oblystyq polıtsııa departamentiniń baspasóz qyzmeti.
