Qyzylordada 15 naýryzdan beri koronavırýs anyqtalǵan 11 júkti áıel bosanǵan
Bas dárigerdiń aıtýynsha, 15 naýryzdan beri karantındik sharalardy saqtana otyryp, ortalyqta barlyǵy 3074 ana bosanǵan. Onyń ishinde 11 áıelden COVID -19 dıagnozy anyqtaldy.
«Sońǵy 9 kúnde COVID-19 dıagnozy qoıylǵan 8 júkti áıel bosandy. Olardy bosandyrýǵa Aqmaral Janábil, Janar Nurymbetova, Aınur Ájimurat, Dana Nurtazaeva, Aqbota Qońqabaeva syndy dáriger, akýsher-gınekologtar atsalysty. Al akýsherler Aıgerim Eńsepbaeva, Ǵalymjan Qudaıbergen de bul baǵytta kóp jumys atqardy. Odan keıin náresteniń jaǵdaıyn qadaǵalaýǵa Raýshan Baltaeva, Maqpal Kereıtbaıqyzy, Shynar Qasymova neonatologtar, meıirbıkeler qatysty.
Ana men balanyń qaýipsizdigi men indettiń aldyn alý úshin mańyzdy sheshimder qabyldanyp, tıisti sharalar der kezinde atqarylýda. Osyǵan sáıkes ortalyqta karantındik shekteýler qatań saqtalyp jatyr. Ortalyqtyń eki ǵımaratynda da naýqastardyń kúndelikti COVID-19 aýrýyna kúdikti naýqastarmen baılanysyn boldyrmaý maqsatynda fıltrızolıator qyzmeti jalǵasyp, ekinshi ǵımaratymyzda provızorlyq statsıonar qaıtadan ashyldy. Qazirgi tańda ortalyqtyń provızorlyq statsıonary barlyq qural-jabdyqtarmen jáne dári-dármektermen, jeke qorǵanysh quraldarymen qamtylǵan», - dedi ortalyqtyń bas dárigeri.
Onyń aıtýynsha, jalpy oblystyq perınataldyq ortalyǵynda 620 qyzmetker jumys isteıdi. Olardyń 35-40%-ke jýyǵy jastar. Pandemııa kezinde ómirlerin qaýipke tigip, qyzmet istegen mamandarymyz memleket tarapynan qoldaý tapty. Dárigerler, akýsher, meıirbıke, tazalyqshylarymyzǵa provızorlyq statsıonardan ústemaqy tólenip otyr.
Esterińizge sala ketelik, 27 maýsymnan Qyzylorda qalasynda karantın kúsheıtildi.