Qyzylordada 14 sáýirden bastap qoǵamdyq kólik qozǵalysyna tyıym salyndy
Bul shara oblys ortalyǵyndaǵy epıdemıologııalyq ahýaldyń kúrdeli bolýyna baılanysty qabyldanyp otyr. Qazir Qyzylorda oblysynda koronavırýs ınfektsııasy dıagnozy qoıylǵan 119 naýqas bar. Onyń ishinde 12 adam oblys ortalyǵynda turady.
«Atalǵan maqsatta arnaıy qabyldanǵan qaýly bar. Soǵan sáıkes tıisti sheshim qabyldandy. Endi 14 sáýirden bastap qoǵamdyq kólik qozǵalysyna tolyq tyıym salyp otyrmyz. Qaýlyda memlekettik uıymdar, barlyq mekemeler jáne kásipkerlik oryndary qashyqtan jumys isteý júıesinde qyzmet atqarý qajettigi kórsetilgen. Ol mekemeler ornalasqan ǵımaratta qyzmet jasaıtyn mamandar sany qysqarady. Sondyqtan barlyq jumys berýshi óz qyzmetkerlerin mekeme kóligimen tasymaldaýǵa mán bergeni jón», - dedi Qyzylorda qalalyq bas memlekettik sanıtarııalyq dárigeri Janar Jetilgenova.
Qyzylorda qalasy ákiminiń orynbasary Bektas Nurıdınov bul sheshim azamattardyń qaýipsizdigi úshin qolǵa alynyp otyrǵanyn jetkizdi.
«Atalǵan sheshimdi tekten tekke qabyldap otyrǵan joqpyz. Qaýipti derttiń ári qaraı taramaýyna tosqaýyl qoıý maqsatynda qolǵa alyndy. Oblys ortalyǵynda adamdardyń júrip-turýyn azaıtý arqyly derttiń betin qaıtarýǵa ábden bolady», - dedi B.Nurıdınov.