Qyzylordada 11 jastaǵy ul bala koronavırýs juqtyrdy
Sońǵy táýlikte Qyzylorda oblysynda koronavırýs ınfektsııasyn juqtyrǵan 16 adam tirkeldi. Olardyń 13-i Qyzylorda qalasynda tursa, 3-i Jańaqorǵan aýdanynan.
«Naýqastardyń ishinde eń úlkeni 1957 jyly týǵan áıel adam bolsa, eń kishisi 2009 jylǵy er bala. PTR analızderi 14 adamnan aýrý juqtyrǵan adammen qarym-qatynasta bolýyna baılanysty alynǵan. Eki adam JRVI klınıkalyq belgileriniń bolýyna baılanysty óz bastamasymen medıtsınalyq tekserýge júgingip, provızorlyq statsıonarǵa jatqyzylyp, analızder alynǵan. Zertteý qorytyndysy naýqastardyń koronavırýs ınfektsııasyn juqtyrǵanyn kórsetti. Patsıentter aýrýhanaǵa oqshaýlandyrylyp, hattamaǵa sáıkes em qabyldap jatyr», - dep málim etti Qyzylorda oblystyq taýarlar, qyzmetterdiń sapasy men qaýipsizdigin baqylaý departamentiniń baspasóz qyzmeti.
Qazirge deıin Qyzylorda oblysynda koronavırýs ınfektsııasyn juqtyrǵan 418 adam tirkelgen. Onyń ishinde emdelip shyqqandar sany - 245 adam.