Qyzylordada 106 jastaǵy anaǵa kurmet kórsetildi
QYZYLORDA. QazAqparat - Qyzylorda oblysynda jasy 100-den asqan 13 qart bar eken. Osyǵan oraı «Nur Otan» partııasy oblystyq fılıaly tóraǵasynyń birinshi orynbasary Ibadýlla Quttyqojaev pen orynbasary Erjan Baıtiles búginde 106 jasqa tolǵan ázız ana Rábıǵa Qoıanbaevany quttyqtap, oǵan respýblıkalyq «Nur Otan» partııasy tóraǵasynyń birinshi orynbasary Máýlen Áshimbaevtyń merekelik quttyqtaýyn tabystady, dep habarlaıdy QazAqparat.
Ǵasyr-ǵumyr ıesi ómir ótkelinde kóp qıyndyqty kórdi. Soǵys jyldarynda tylda eńbek etip, berekeli isti bekem etti. 1929 jyldary ákesi qýǵynǵa ushyrap, bul otbasynyń basyna kóp taýqymet tústi. Rábıǵa apaı asharshylyqty kózben kórgen búgingi kýágerdiń biri. Odan beri de masaq terip, kúrish te aqtady. Sol eńbektiń zeınetin de kórdi. Jan jary Myrzahmet ekeýi shańyraq kóterip, 6 balany ómirge ákeldi. Qazir máýeli báıterek sekildi sol urpaǵynyń ortasynda baqytty ǵumyr keship otyr. Shóbere-shópshek súıip, áýlettiń ázız anasyna aınaldy.
«Búginde elimizdiń beıbit ómir súrip otyrǵany qýantady. Osy oraıda Elbasynyń kóregen saıasatyn joǵary baǵalaımyz. Biz kóp qıyndyq kórdik. Árdaıym beıbitshilik bola bersin», dedi abzal ana.
Partııanyń «Ardagerlerdi ardaqtaıyq» jobasy aıasynda uıymdastyrylyp otyrǵan aktsııa barlyq aýmaqtyq fılıaldarda jalǵasyn tapty.
Ádilet QAŃTARBAEV.
