Qyzylordada 106 oqýshy «Altyn belgiden» úmitti
QYZYLORDA. QazAqparat-Qyzylorda qalasy boıynsha mektep bitirýshi 1 myń 739 túlek jańa ómirge joldama aldy. Olardyń 106-sy «Altyn belgiden», 98-i úzdik attestattan úmitti.
Merekege baılanysty qala ákimi Nurlybek Nálibaev Іlııas Qabylov atyndaǵy № 12 orta mektebinde ótken saltanatty jıynǵa qatysyp, jas túlekterdi quttyqtady. Bul týraly QazAqparat tilshisi habarlady.
«Búgingi kún - shákirtteriniń boıyna taýdaı talap pen bilim dánin sepken ustazdar qaýymynyń eseli eńbeginiń jemisti mezeti. Búgingi kún - kúni keshe ǵana balasyn mektepke jetelep alyp kelgen ata-ana úshin ul-qyzynyń er jetip, arman bıigine qanat qaqqanyn kórer, júrek tebirenterlik shaq. Bilim berý - ata-ana úshin ǵana emes, tutas qoǵam úshin qasterli paryz. Bilim alý - eńseli el bolýdy maqsat tutqan árbir jan úshin qasıetti borysh. Elbasy Nursultan Ábishuly Nazarbaevtyń memleketimizde júrgizip otyrǵan sarabdal saıasatyn jalǵastyratyn, ulttyq ıdeologııamyz «Máńgilik eldi» maqsat tutqan elimizdiń aýqymdy strategııalyq baǵdarlamalaryn júzege asyratyn da, onyń naqty jemisin kóretin de osy búgingi túlek, erteńgi el tizginin qolǵa alar óskeleń urpaq dep bilemin», - dep atap ótti qala ákimi.
Saltanatty shara barysynda, jas túlekter ustazdar qaýymyna alǵystaryn jetkizip, 1-synypty aıaqtaǵan balǵyn búldirshinder aǵa-ápkelerine arnalǵan ónerlerin ortaǵa saldy.
