Qyzylordada 100 balaǵa arnalǵan ákim shyrshasy ótti
QYZYLORDA. QazAqparat - Búgin qalalyq oqýshylar saraıynda Qyzylorda ákiminiń balǵyn búldirshinderge arnalǵan Jańa jyldyq shyrshasy ótti, dep habarlady QazAqparat tilshisi.
Arnaıy uıymdastyrylǵan merekelik sharaǵa jetim jáne ata-anasynyń qamqorlyǵynsyz qalǵan, turmysy tómen, áleýmettik az qamtamasyz etilgen, kóp balaly otbasy balalary, múmkindigi shekteýli búldirshinder jáne bilim, óner, sportta jetistikterge qol jetkizgen talantty da daryndy oqýshylardan barlyǵy 100 bala qatystyryldy.
Qala ákimi N.Nálibaev balalardy quttyqtap, ótip bara jatqan 2016 jyly bilim salasynyń jetken jetistikterine toqtalyp ótti.
«Aınalaıyn búldirshinder! Sizderdi, ertegiler álemine eliktirer shattyq shadymanǵa toly eń ǵajaıyp merekelerdiń biri - Jańa jyl merekesimen shyn júrekten quttyqtaımyn!
Bul ómirde balbóbek balǵyndar - Sizderdiń júzderińizden nur shashyp, bar yqylastaryńyzben rıza bolǵandaryńyzdy kórýden asqan baqyt joq.
Búgingi uıymdastyrylyp otyrǵan saltanatty shara tek Sizderdiń qurmetterińizge arnalady.
Bul, jyl kóleminde tálimdi tárbıesi men alǵyrlyǵyn kórsetken oqýshylarǵa aǵa býyn ókilderiniń aıtqan alǵysy dep qabyldańyzdar.
Balǵyn balalyqtyń bazarynda baqyt shapaǵatyna bólene berińizder», - dedi shahar basshysy.
"Qar hanshaıymy" ertegisiniń jelisinde ótkizilgen erteńgilik, oqýshylar saraıynyń ónerpazdary ázirlegen án men bıge ulasyp, Aıaz ata men Aqshaqarǵa ónerlerin kórsetti.
Sharada balalarǵa arnaıy daıyndaǵan syılyqtar (netbýk, táttiler) tabystalyp, qala ákimi balalarǵa jańa jyldyq tortty úlestirdi.
Shara sońynda, barlyq qatysýshy búldirshinder merekelik tátti dastarqannan dám tatty.
