Qyzylordada 1 tamyzdan bastap elektr energııasy arzandaıdy
QYZYLORDA. QazAqparat - Qyzylordada 1 tamyzdan bastap elektr energııasynyń tarıfi arzandaıdy, - dep habarlady QazAqparat.
QR Tabıǵı monopolııany retteý agenttiginiń óńirlik departamenti 2016 jylǵy elektr energııasyna júrgizgen tekserý qorytyndysyna oraı osyndaı sheshim qabyldady.
Departament dırektorynyń mindetin atqarýshy Gúlmıra Ótegenovanyń aıtýynsha aımaqtaǵy energııamen jabdyqtaýshy uıymdar bıylǵy jyldyń 1 tamyzynan bastap tarıfterin azaıtady. Onyń ishinde «Energoservıs» EJShS kıllovatt saǵatta tutynylǵan (QQS-pen) energııa tarıfin 18,67 teńgeden 17,74 teńgege deıin, «Shıeli Jaryǵy» JShS 19,08 teńgeden 18,45 teńgege deıin, al «Dáýletenergo» 14,24 teńgeden 14,06 teńgege deıin tómendetedi.
Sonymen qatar, departament 2016-2017 jylǵy jylý maýsymyna júrgizgen zertteý nátıjesine súıene otyryp, «Qyzylordajylýelektrortalyǵy» MKK men «Temirjolsý Qyzylorda» jaýapkershiligi shekteýli seriktestigine jylý qunyn syrttaǵy aýa temperatýrasymen sáıkestendirip qaıta esepteý jóninde uıǵarym berdi.
