Qyzylorda jurtshylyǵy Qamshybek Qońqabaevqa kólik mingizdi

QYZYLORDA. QazAqparat - Tokıo Olımpıadasynda bokstan qola júldeger atanǵan Qamshybek Qońqabaevqa jerlesteri jańa kóliktiń kiltin tabys etti, dep habarlaıdy QazAqparat tilshisi.

Búgin oblys ákimi Gúlshara Ábdiqalyqova Tokıo Olımpıadasyna qatysqan qyzylordalyq sportshylar Qamshybek Qońqabaev, Dáýlet Nııazbekov jáne Móldir Jańbyrbaımen júzdesti. Aımaq basshysy qola júldeger Qamshybek Qońqabaevty jáne dúbirli dodada el namysyn abyroımen qorǵaǵan Dáýlet Nııazbekov jáne Móldir Jańbyrbaıǵa alǵysyn bildirdi. Sportshylardyń jeńisi El Táýelsizdigine úlken tartý bolǵanyn atap ótti.

«Eki apta boıy ózderińe jankúıer boldyq. Qamshybektiń altynǵa bergisiz qola júldesi eldiń kóńilin kóterdi. Talaı búldirshinniń qııalyna qanat bitirdi. El Prezıdentinen Memlekettik Týdy alý -qashanda úlken mártebe, zor senim! Bul mindetti jerlesimiz Qamshybek Qońqabaev abyroımen aqtap, baıraǵymyzdy Olımpıada tórinde jelbiretti», - dedi oblys ákimi.

Bıyl Syr sportshylary tolaıym tabystarǵa qol jetkizýde. Jyl basynan jerlesterimiz el birinshilikterinde 700 medal jeńip alsa, Álem, Azııa chempıonattarynda 46 medalǵa qol jetkizdi.

Kezdesýde oblys ákimi Gúlshara Ábdiqalyqova el namysyn abyroımen qorǵap shyqqan Qamshybek Qońqabaevqa «Toyota Camry 75» avtokóliginiń kiltin tabys etti.

Al Olımpıada oıyndarynyń qatysýshylary Dáýlet Nııazbekov, Móldir Jańbyrbaıǵa jáne Qamshybek Qońqabaevtyń bapkeri Seıitjan Tókenovke 1 mln teńgeniń sertıfıkaty berildi. Eldiń rýhy men mártebesin kótergen sportshylarǵa «Dalatex» JShS-niń basshysy Dımash Ábishev, «Nurlen» JShS-niń basshysy Qaırat Boranbaev, «Melıorator» JShS-niń basshysy Berdibek Myhanov jáne «Standart Oıl KZO» JShS-niń basshysy Ádil Bıjanov demeýshilik kórsetti.

Sondaı-aq, jıynda aýyr atletıkadan 4 dúrkin álem chempıony, QR eńbek sińirgen sport sheberi Ilıa Ilın Qamshybekti jeńisimen quttyqtady. Al Móldir men Dáýletke aldaǵy saıystarda sáttilik tiledi.

Eske salsaq, dúbirli dodaǵa Qazaqstan atynan 97 sportshy sporttyń 28 túrinen baq synady.

Qazaqstan sportshylary segiz qola medal aldy. Olardyń qatarynda dzıýdoshy Eldos Smetov, aýyr atletter Igor Son men Zýlfııa Chınshanlo, boksshylar Qamshybek Qońqabaev, Sáken Bıbosynov, palýan Nurıslam Sanaev pen karateshi Darhan Asadilov pen Sofıa Berýltseva bar.