Qyzylorda - Jezqazǵan jolynda jóndeý jumystary qashan bastalady
QARAǴANDY. QazAqparat – Bıyl kópten kútken Qyzylorda - Jezqazǵan jol jobasyn júzege asyrý bastalady. Bul týraly premer-mınıstr Asqar Mamınniń tóraǵalyǵymen ótken Úkimet otyrysynda belgili boldy, dep habarlaıdy QazAqparat tilshisi.
Qaraǵandy oblysynda jol ınfraqurylymyn damytý josparlary týraly Jeńis Qasymbek baıandady. Oblys basshysy óńirdi damytý úshin Qaraǵandy - Qarqaraly, Jezqazǵan - Arqalyq, Jezqazǵan - Qaraǵandy sekildi mańyzdy jol jobalaryn atap ótti.
«Búgingi tańda, Mınıstrliktiń málimeti boıynsha, Jezqazǵan – Qyzylorda oblysynyń shekarasy avtojolynyń 208 shaqyrymyn qaıta jańartýǵa jobalyq qujattamany ázirleý aıaqtaldy. Jezqazǵan jáne Qaraǵandy qalalary arasyndaǵy baılanysqa, onyń ishinde týrıstik klasterdi damytý úshin qajettilik zor», - dep habarlady Jeńis Qasymbek.
Aıta ketý kerek, avtojoldardyń uzyndyǵy boıynsha Qaraǵandy oblysy respýblıkada besinshi orynda tur. Qyzylorda - Jezqazǵan ýchaskesi burynnan jóndeýdi qajet etedi. Bul máseleni oblys turǵyndary da birneshe ret kótergen bolatyn.
«Aǵymdaǵy jyly jalpy uzyndyǵy 6 myń shaqyrym avtojoldardy qaıta qalpyna keltirý, jóndeý jáne salý boıynsha, onyń ishinde 1,2 myń shaqyrym jolda qozǵalysty asha otyryp, iri jobalardy aıaqtaý qajet, mysaly, Taldyqorǵan-Óskemen (768 km), Qaraǵandy – Balqash - Qapshaǵaı (645 km), Qalbataý-Maıqapshaǵaı (415 km) jáne basqalary sııaqty iri jobalar iske asyrylatyn bolady. Qyzylorda - Jezqazǵan – bul óte mańyzdy joba. Ákimdikter 2,6 myń shaqyrym jergilikti avtojoldardy salýdy josparlap otyr. Sondaı-aq, jol boıyndaǵy servıstiń 125 jańa nysany salynady», - dedi Asqar Mamın.
Jergilikti mańyzy bar joldarǵa keletin bolsaq, bıyl jóndeý jumystarymen 700 shaqyrym avtomagıstral qamtylatyn bolady. Jóndeý jumystary 80 aýylda, sondaı-aq oblystyń barlyq qalalary men aýdandarynda júrgiziledi. Óńirdiń 59 asfalt-beton zaýyty, 3 myń arnaıy tehnıka jáne 5 myń adam tartylatyn bolady.
Qoldanylatyn materıaldar men júrgiziletin jumystardyń sapasyna erekshe nazar aýdarylady. Ol úshin jol aktıvteri sapasynyń ulttyq ortalyǵymen sharttar jasaldy.
Sondaı-aq, bıyl Qaraǵandy - Balqash jáne Balqash - Býrylbaıtal ýchaskelerinde jumystar jalǵasatyn bolady. Jyl sońyna deıin tórt jolaq boıynsha qozǵalys ashylady jáne jeke ýchaskeler paıdalanýǵa beriledi.
