Qyzylorda - Jezqazǵan jolyn salý keıinge qaldyryldy
ASTANA. QazAqparat - QR Investıtsııalar jáne damý mınıstr Jeńis Qasymbektiń aıtýynsha, «Jezqazqan - Qyzylorda» tas jolynyń qurylysy kelesi jylǵa shegerildi, dep xabarlaıdy QazAqparat tilshisi.
«Atalǵan jol boıynsha biz byltyr aqparat bergenbiz. Ústimizdegi jyldyń sońynda tıisti jumysty bastaımyz degen jospar bolǵan. Osy joba boıynsha Eýropa damý bankimen kelissózder ótkizgenbiz. Sosyn Úkimette bir-eki ret osy máseleni kóterilgen. Oblys ákimidigi de talaı ret kóterdi. Biraq bıylǵy jylda qarajat bólingen joq. Ony kelesi jylǵa qaldyryp otyrmyz», - dedi Jeńis Qasymbek Úkimet otyrysynan keıingi baspasóz máslıxatynda.
Onyń aıtýynsha, Ústimizdegi jyly «Nurly jol» baǵdarlamasy aıasynda jalpy uzyndyǵy 4,4 myń shaqyrym joldarda kúrdeli jóndeý jumystary júrgiziledi. Sonyń ishinde jańadan salynatyn joldar da bar. «Bárińiz jaqsy bilesizder, ortalyq pen batysty, ortalyq pen shyǵysty, ońtústikti qosamyz. Sondaı-aq Almaty-Taldyqorǵan, ary qaraı Óskemenge baratyn jol, Aqtóbeden Astraxanǵa baratyn jol, Aqtaýǵa baratyn jol, Oralǵa. Jalpy, bıyl jol qurylysyna 100 myń adam qatysady degen jospar bar», - dep atap kórsetti mınıstr.
Aıta keteıik, Úkimettiń búgingi otyrysynda «Nurly jol» baǵdarlamasy aıasynda atqarylǵan jumystar qaraldy. Premer-Mınıstr Baqytjan Saǵyntaev bıýdjet qarjysyn ýaqytynda ıgermegen oblys ákimderin bir «silkip» aldy. Sosyn qarjy mınıstri Baqyt Sultanovqa shúılikti.
Otyrystan keıingi baspasóz máslıxatynda Baqyt Turlyxanuly Úkimet basshysynyń synyna jaýap berdi.
