Qyzylorda-Jezqazǵan avtojolynyń bıyl 100 shaqyrymy aıaqtalady
Delegatsııa quramynda QR ETRM Sý resýrstary komıteti tóraǵasynyń orynbasary Dosbol Bekmaǵanbetov, «QazAvtoJol» UK» AQ basqarma tóraǵasy, dırektorlar keńesiniń múshesi Meırhat Qasymbaev jáne «QazAvtoJol» UK» AQ syrtqy zaımdar departamenti dırektory Marat Mahambetov bar.
Aldymen aımaq basshysy Ǵabıt Ábdimájitulyna Qyzylorda sý torabynyń qaıta jańǵyrtý jumystarymen tanystyrdy. Nysan 1956 jyly salynǵan. Qazirgi tańda ol 110 myń ga sýarmaly jáne 250 myń ga jaıylymdyq jerdi aıaq sýmen qamtıdy. Munda 2020 jyly bastalǵan qaıta jańǵyrtý jumystary barysynda sol jaǵalaýdaǵy shlıýz-rettegish, jańa sý toraby, sý beketteri men transformatorlyq qosalqy stantsııa salynyp, torap aımaǵy abattandyrylatyn bolady. Jobanyń bas merdigeri jumysty bıyl aıaqtamaq.
Ári qaraı delegatsııa músheleri «Qyzylorda-Jezqazǵan» avtojolyn qaıta jańǵyrtý barysymen tanysyp, jol qurylysyna qajetti bıtýmdy saqtaıtyn qoımalardy aralady. Eske salsaq, atalǵan avtokólik jolyn qalpyna keltirý máselesi kóptegen jyldar boıy sheshimin tappaı keldi. 2021 jyly Qyzylorda oblysyndaǵy 204 shaqyrym boıynsha 6 lotqa bólinip, memlekettik satyp alý konkýrsy ótkizildi. Ótken jyly merdiger mekemeler «Qytaı azamattyq ınjenerlik-qurylys korporatsııasy» JShQ, «Qyran» JShS, «Gýıchjoý jol-ınjenerlik korporatsııasy» JShQ, jáne «Stecol Corporation» qurylysqa qajetti qujattardy ázirlep, daıyndyq jumystaryn júrgizdi. Bıyl merdiger mekemeler joldyń 100 shaqyrymnan astam bóligin aıaqtaýdy josparlaýda, qurylys materıaldarynyń basym bóligi qoımaǵa jetkizildi.
«Qyzylorda-Jezqazǵan joly - Prezıdenttiń tikeleı baqylaýyndaǵy úlken joba. Halyqtyń da birshama ýaqyttan beri kóterip júrgen máselesi. Sondyqtan joldyń sapaly salynýy, merziminde aıaqtalýy óte mańyzdy. Bul joba jol boıy logıstıkasyn damytyp, jol qatynasyn edáýir jeńildetýge sep bolmaq», - dedi tanysý barysynda Ǵabıt Ábdimájituly.
«Rasymen halyq bul jańalyqty uzaq kútti. El Prezıdenti Qasym-Jomart Kemelulynyń bastamasymen joba bastaldy. Biz ózimizdiń aımaqtan ótetin joldyń sapaly salynýyna atsalysatyn bolamyz», - dedi oblys ákimi Nurlybek Nálibaev.
Tústen keıin Ǵabıt Syzdyqbekov aımaq basshysymen birge Jańaqorǵan jáne Shıeli aýdandaryna tikushaqpen baryp, Syrdarııa ózenindegi sý deńgeıin kórip, jaǵdaımen tanysty. Aıta keteıik, qazirgi tańda oblysta 29 sý basý qaýipi bar aımaq anyqtalyp, oǵan 366 arnaıy tehnıka jáne 1137 adamy bar 138 jaýapty mekeme bekitildi. Oblystyń barlyq aýmaǵynda ózen boıynda táýlik boıy kezekshilik uıymdastyrylýda. Darııadaǵy jaǵdaı qalypty, barlyq qajetti materıaldar men tehnıka qamtamasyz etilgen.
Sapar sońynda QR Úkimeti apparaty basshysynyń birinshi orynbasary óńirdegi júrgizilgen jumystar tabysty aıaqtalýyna tilektestik bildirdi. Ǵabıt Ábdimájitulynyń jumys sapary Túrkistan oblysynda jalǵasatyn bolady.
