Qyzylorda jastary muqtaj otbasylardyń balalaryna kompıýter qurastyrady

QYZYLORDA. QazAqparat - Qyzylordalyq jastar jańa oqý jylynda áleýmettik jaǵynan muqtaj otbasy balalaryn kompıýtermen qamtamasyz etý maqsatynda ıgilikti isti qolǵa aldy, dep habarlaıdy QazAqparat tilshisi.

Sońǵy jyldarda Qyzylordada jumysyn bastaǵan «Jastar resýrstyq ortalyǵy» janyndaǵy ІT parkte turǵyndar alyp kelgen eski kompıýter kádege jaratylady. Munda eski kompıýterdegi jaramdy qosalqy bólshekter paıdalanylyp, sonyń nátıjesinde basqasy qurastyrylady.

Ortalyqta budan bólek IT kitaphana jastarǵa qyzmet kórsetedi. Kitaphanada turmysy tómen, múmkindigi shekteýli balalar bilimin jetildire alady. Oǵan qosymsha arnaıy volonter, erikti muǵalimder tartylǵan. IT kitaphanada bar jaǵdaı qarastyrylǵan, ınternet jelisi qoljetimdi.

Halyqaralyq jastar kúnine oraı «Jastar resýrstyq ortalyǵynda» jańa Syrjastary.kz saıtynyń tusaýkeseri ótti. Saıtta óńir jastaryna qatysty kúndelikti aqparat men jańalyq jarııalanady. Kóshbasshylar jaıly tyń málimetter, qajetti kitap qorlarynyń elektrondy nusqasy da sol saıtta qamtylady. Jastardyń qyzyǵýshylyǵyn anyqtaý maqsatynda saýalnama uıymdastyrý qarastyrylǵan.

«Syr jastary «Birgemiz: Asyl Mura» baǵyty boıynsha Qoǵalykól irgesindegi «Qysh qala» arheologııalyq aımaǵyna ekskýrsııa uıymdastyrdy. Sebebi, tól tarıhtyń paraqtaryn aqtara otyryp, árbir azamat týǵan ólkesiniń tarıhyn bilýi kerek», - dedi oblystyq «Jastar resýrstyq ortalyǵynyń» dırektory Baýyrjan Mastekov.

Taǵy bir aıta keterligi, probatsııa esebindegi turǵan jastarmen de júıeli jumystar júrgizilip keledi. Bul baǵytta probatsııa qyzmetimen birlesken joba iske asty. Maqsat – psıhologııalyq keńes berý, jastarǵa oı salý jáne jasaǵan qylmysty qaıtalamaýyna septigin tıgizý.

Sondaı-aq, Qyzylordada volonterler arheologııalyq zertteý jumysyna qatysady.