Qyzylorda tusynda Syrdarııa sýy bógetti buzyp ketti
QYZYLORDA. QazAqparat - Syrdarııa ózeni dúleı minezin kórsete bastady. Darııa sýy Qyzylorda qalasy tusyndaǵy eski bógetti buzyp ketti, dep habarlaıdy QazAqparat tilshisi.
Byltyr darııanyń Qyzylorda qalasy tusynda qorǵanys bógeti salynǵan bolatyn. Sondyqtan oblys ortalyǵynyń jańa aýmaǵy boıy kóterip jatqan sol jaǵalaý bóligine eshqandaı qaýip tóngen joq. Topan sý arnasynan shyǵa qoımady.
«QR Úkimetiniń jáne tótenshe jaǵdaı shyǵyndarynan arnaıy qarjy bólinip, oǵan 10 shaqyrymǵa jýyq qorǵanys bógeti salyndy. Eski bógetti buzyp ketken sý jańa qorǵanys bógetinen asa alǵan joq. Biz eski bógetti qalpyna keltirýge kóńil bóldik. Oǵan tıisti mekemeler, qala ákimdigi shuǵyl túrdi qajetti jumystardy júrgizdi. Osylaısha eski qorǵanys bógeti tolyq qalpyna keltirildi», - dedi Qyzylorda oblystyq jumyldyrý daıyndyǵy basqarmasy bastyǵynyń orynbasary Ǵabıt Jańabaev.
Qazirgi tańda Shardara sý qoımasynan tómengi bólikke sekýndyna 900 tekshemetr sý bosatylyp jatyr. Onyń 400-i Kóksaraı sý qoımasyna jiberilse, qalǵany Qyzylorda oblysyna keledi. Ol 10 qańtarda oblys shekarasyna kelip jetedi dep josparlanyp otyr
«Aldaǵy kúnderi Shardara sý qoımasynan tómengi bólikke bosatylatyn sý mólsherin sekýndyna 800 tekshemetrge tómendetý baǵytynda tıisti is-sharalar jasalýda. Qazirgi tańda Qyzylorda oblysynyń Jańaqorǵan, Shıeli aýdandarynda eshqandaı muz ustasyp turǵan joq. Qyzylorda qalasy men qalǵan aýdandarda muz qalyńdyǵy ártúrli. Ázirge seńniń júrý ýaqytyna tolyq boljam jasaý qıyn. Degenmen onyń júrý ýaqytynda darııadan keletin sý deńgeıiniń tómen bolýy mańyzdy sanalady», - dedi QR Qorshaǵan orta jáne sý resýrstaryn paıdalanýdy retteý jáne qorǵaý jónindegi Aral-Syrdarııa basseındik ınspektsııasynyń basshysy Ádilhan Qarlyhanov.
Qazir oblys aýmaǵyndaǵy barlyq qaýipti tus erekshe baqylaýǵa alynǵan, kúndiz-túni kezekshilik uıymdastyrylýda.
Budan buryn Qyzylorda oblysy aýmaǵynda Syrdarııa boıynda sý tasqyny qaýpi oryn alyp otyrǵany aıtylǵan bolatyn.
Esterińizge sala ketelik, 25 jeltoqsanda Qyzylorda oblysy Qazaly aýdany aýmaǵynda darııa boıyndaǵy qorǵanys bógeti jaryldy. Al odan keıin Qazgıdromet Syrdarııanyń arnasynan shyǵyp ketýi múmkin ekenin habarlady.
