Qyzylorda túrmesine tsement arasyna esirtki men shprıts jasyryp kirgizbek bolǵan
NUR-SULTAN. QazAqparat – Qyzylorda oblysynda qylmystyq atqarý júıesiniń qyzmetkerleri bir aptaǵa jýyq ýaqyttyń ishinde 190-nan astam tyıym salynǵan zatty tárkilegen, dep habarlaıdy QazAqparat.
Túrmege tyıym salynǵan «tapsyrystardy» jetkizý úshin zańbuzýshylar túrli tásilder qoldanǵan.
Mysaly, abaqty aýmaǵynda qum blogyn soǵýmen aınalysatyn jaýapkershiligi shekteýli seriktestikke tsement ákelgen «KamAZ» júk kóligin tekserý kezinde 190 tyıym salynǵan zat tárkilengen.
«Oqıǵa 9 shildede boldy. Keshki saǵat altylar shamasynda Qyzylorda oblysy boıynsha qylmystyq atqarý júıesi departamentiniń ZK-169/5 mekemesiniń aldyna tsement tıelgen kólik kelip toqtaǵan. 44 jastaǵy «KamAZ» júrgizýshisi kolonııa aýmaǵynda ornalasqan kásiporynǵa 196 qap qurylys qospasyn ákele jatqanyn aıtqan. Tekserý barysynda jedel bólim qyzmetkerleri 7 qaptan 190-nan astam tyıym salynǵan zat taýyp, tárkiledi. Atap aıtsaq, 63 shprıts, shamamen 0,5 keli esirtki, 43 uıaly telefon, 14 jup qulaqqap, 13 SIM-karta, 35 qaýattaǵysh qurylǵy, 1 shaǵyn kamera, 10 qorap oıyn kartasy, jarty lıtrlik qutylarǵa salynǵan 12 «nasybaı» bótelkesi jáne 3 lıtr spırt shyqty», - dep jazady oblystyq qylmystyq atqarý júıesi departamentiniń baspasóz qyzmeti.
«Tapsyrysty» oryndaýshylar uıaly telefondar men esirtkiniń senimdi jerde saqtalýyna qatty kóńil bólgen kórinedi.
Tsement toly qaptardy jaryp qaraý arqyly ǵana anyqtaý múmkin bolǵan.
Atalǵan fakti boıynsha qalalyq polıtsııa basqarmasynyń jedel-tergeý toby sotqa deıingi tergeý bastady.
Al abaqty aýmaǵynda qum blogyn shyǵaratyn seriktestikpen jasalǵan kelisimsharttyń kúshi joıyldy.
Atalǵan kásiporyn bul mekeme aýmaǵynda 2017 jyldan beri jumys istep kelgen.
Al 14 shildede ZK-169/1 mekemesiniń sottalýyshlaryna joldanǵan azyq-túlikti tekserý kezinde maıonez qorabynan SIM-kartasy bar uıaly telefon tárkilengen.
«Tergeý barysynda tapsyrys ıesi osyndaǵy urlyq jasaǵany úshin sottalǵan adam ekeni belgili boldy. Endi onyń syrtttaǵylarmen baılanysy shekteledi. Al tapsyrysty jetkizýshi Ákimshilik quqyq buzý týraly kodekstiń 481-baby boıynsha jaýapqa tartyldy», - deıd Qyzylorda oblysy boıynsha QAJD bastyǵy Shaımerden Eskenkeldıev.
Onyń aıtýynsha, Qyzylorda oblysynda QAJ aýmaqtyq departamentine qarasty 3 mekeme bar.
Ol sondaı-aq, qurylys materıaly arqyly esirtki kirgizý sııaqty qylmystyq áreketter oblys aýmaǵynda birinshi ret tirkelip otyrǵanyn, budan bylaı abaqty aýmaǵyndaǵy jumys berýshilerdiń qyzmetine qatań baqylaý ornatylatynyn aıtty.
