Qyzylorda túrmesine bálish ishine jasyrylǵan esirtki ótkizilmek boldy

QYZYLORDA. QazAqparat - Qyzylorda qalasynda ornalasqan ZK-169/5 mekemesinde jazasyn óteýshige kelgen tanysy bálish ishine esirtki jasyryp ótkizbek boldy. Bul jóninde Qyzylorda oblystyq Qylmystyq atqarý júıesi departamentinen málim etti, dep habarlaıdy QazAqparat tilshisi.

Jazasyn óteýshige kelgen tanysynyń zattary arnaıy ornatylǵan rengten apparatymen tekserilgen. Nátıjesinde onda bálish ishine jasyrylǵan esirtki bar ekendigi anyqtalyp, ótkir ıisi bar, jasyl tústi zat tárkilengen.

«Tárkilengen zat boıynsha jedel túrde 102 nómirine habarlandy. Oǵan Qyzylorda qalalyq polıtsııa basqarmasynyń jedel-tergeý toby shaqyryldy. Sot-hımııalyq saraptamasynyń qorytyndysymen tárkilengen zat 30,25 gramm keptirilgen marıhýana ekeni dáleldendi. Atalǵan derek boıynsha QR Qylmystyq kodeksiniń 297 babynyń 1-bóligimen sotqa deıingi tergep-tekserý amaldary júrgizilýde», - dep málim etti vedomstvodan.