Qyzylorda turǵynynan jarty kelige jýyq marıhýana alyndy

QYZYLORDA. QazAqparat - Qyzylordada polıtseıler esirtki tasymaldaǵan kúdiktini ustady, dep habarlaıdy QazAqparat Polisia.kz silteme jasap.

6 naýryz kúni jedel-profılaktıkalyq is-shara barysynda Qarmaqshy aýdanynyń aýmaǵy arqyly ótetin «Samara-Shymkent» tas jolynyń boıynda Qyzylorda oblysy PD qyzmetkerleri «VAZ-2115» markaly avtokólikti toqtatqan.

«Polıtsııa qyzmetkerleri kólikti toqtatqan kezde júrgizýshi avtokóliktiń aldyńǵy terezesinen polıetılen paketke salynǵan zatty laqtyryp jibergen. Tekserý barysynda pakettiń ishinde jasyl tústi, erekshe ıisi bar zat bar ekeni anyqtaldy. Saraptama qorytyndysyna sáıkes oqıǵa ornynan tabylǵan zat – jalpy salmaǵy 464,84 gr keptirilgen marıhýana bolyp shyqty. Kólik tizgininde Qyzylorda qalasynyń 40 jastaǵy turǵyny otyrǵan», delingen habarlamada.

Qazir fakt boıynsha Qylmystyq kodekstiń 296-baby 2-bóligimen (esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý) sotqa deıingi tergep-tekserý júrgizilip jatyr.