Qyzylorda turǵyny prınterde basyp shyǵarylǵan 20 myń teńgelik jalǵan aqshany ótkizdi dep aıyptaldy

QYZYLORDA. QazAqparat - Qarjy monıtorıngi agenttiginiń Qyzylorda oblysy boıynsha departamenti jalǵan banknottardy saqtaý jáne birneshe ret ótkizý faktisi boıynsha qylmystyq istiń tergeýin aıaqtap, is materıalyn sotqa joldady, dep habarlaıdy QazAqparat.

Qyzylorda qalasynyń 28 jastaǵy turǵyny nomınaly 20 000 teńgelik birneshe banknotty saqtaǵany jáne olardy janar-jaǵarmaı beketi men avtobólshek satatyn dúkenge ótkizgeni úshin aıyptaldy.

Zat satyp alyp, quny 20 000 teńgelik banknotty ótkize otyryp, qaıtarymyna QR Ulttyq bankiniń túpnusqa banknottaryn alyp otyrǵan.

Azamat óz kinásin tolyq moıyndady.

Krımınalıst mamandardyń zertteýi barysynda ótkizilgen banknottardyń Ulttyq banktiń aqsha belgisine sáıkes kelmeıtinin jáne aqshanyń prınterde basyp shyǵarylǵany belgili boldy.

Aıta keteıik, Qazaqstan zańnamasynda bul qylmys úshin 5 jyldan 10 jylǵa deıingi merzimge bas bostandyǵynan aıyrý túrinde jaýapkershilik kózdelgen.