Qyzylorda turǵyny asa iri mólsherde esirtki saqtaǵan
QYZYLORDA. QazAqparat - Qyzylordada jergilikti polıtsııa qyzmetkerleri asa iri mólsherde esirtki zatyn saqtaǵany úshin 49 jastaǵy turǵyndy ustady, dep habarlaıdy QazAqparat tilshisi.
Qyzylorda oblystyq Polıtsııa departamenti esirtki qylmysyna qarsy is-qımyl basqarmasynyń mamandary jedel izdestirý sharasyn júrgizdi. Atalmysh shara barysynda Qyzylorda qalasynyń 49 jastaǵy turǵyny ustaldy.
«Qolǵa túsken azamattan jalpy salmaǵy 1 keli 400 gramnan asatyn gashısh esirtki zaty tárkilendi. Ol skotch pen gazet qıyndysyna oralǵan», - dep málim etti Qyzylorda oblystyq polıtsııa departamentiniń baspasóz qyzmeti.
Atalmysh derek boıynsha Qazaqstan Respýblıkasy Qylmystyq kodeksiniń 296-baby 4-bóligimen sotqa deıingi tergeý-tekserý amaldary júrgizilýde. Ol kinásin tolyǵymen moıyndady. Atalǵan azamat Qyzylorda qalalyq ishki ister basqarmasynyń ýaqytsha ustaý abaqtysyna qamaldy.
