Qyzylorda temirjol aýrýhanasyna demeýshiler qarjysyna alynǵan tynys alý apparaty tabystaldy
Kezdesý barysynda indetpen kúreste alǵy shepke shyǵyp, adam janyna arasha túsip júrgen medıtsına qyzmetkerlerine ákimdik tarapynan qoldaý kórsetiletinin jáne onyń aldaǵy ýaqytta da jalǵasatynyn jetkizdi.
Іndetpen kúreste óńirdiń erikti turǵyndary asqan belsendilik tanytyp, qaýipti keselden arylýǵa úlken septigin tıgizip keledi. Eriktiler qatarynda kásipkerler, qurylysshylar, máslıhat depýttary da bar. Osyndaı jomart júrek, darhan kóńil jandardy qala ákimdigi ıgi iske uıystyryp, vırýspen kúreste belsendilik tanytyp keledi. Nátıjesinde az ýaqytta 41 mln teńgeden astam qarjy jınalyp, aımaq ortalyǵyndaǵy emdeý mekemelerine qajetti qural-jabdyq alyndy. Onyń ishinde 48 ottegi kontsentratory bar.
Qaýipti ınfektsııa kúsheıgende qol qýsyryp qarap otyrmaı qoldan kelgen kómegin kópke usynǵan kásipkerdiń biri - Nurbolat Ibraev. «Avto-Lıder Qyzylorda» JShS dırektory «Temirjol aýrýhanasyna» 1 mln teńge qarajatpen demeýshilik jasady. Jeke kásipker bul qarajatqa 2 ottegi kontsentratoryn alyp, aýrýhanaǵa tabystady.
Qaı ýaqytta bolmasyn elge ıgi is jasap, týǵan topyraqqa qoldaý kórsetý perzenttik paryzym dep sanaıtyn azamat basqa kásipkerlerdi de dertpen kúreste belsendi bolýǵa shaqyrdy.
«Qyzylorda temirjol aýrýhanasynda» 40 oryndyq provızorlyq statsıonar 27 maýsymnan bastap jumys istep keledi. Búginde onda 21 adam emdelip jatyr. Mekemeniń dırektory Sultanbek Kenjebaev ottegi kontsentratorynyń qazirgi tańda aýadaı qajettigin aıtyp, saladaǵy tapshylyqty tıimdi sheship berip otyrǵan qala ákimine alǵysyn jetkizdi.
Aıta keteıik, Qyzylorda qalasy ákimdiginiń 30-ǵa jýyq qyzmettik kóligi emhanalar men arýhanalarǵa qyzmet kórsetýde. Sonymen birge qala ákimdigi tarapynan dárigerlerdiń qaýipsizdigin qamtamasyz etý maqsatynda indetpen kúresip jatqan medıtsına qyzmetkerlerin ornalastyrý úshin «Syrdarııa» lagerinen 100 oryn daıyndaldy. Qajetti ottegi ballondary, medıtsınalyq qural-jabdyqtarmen ájen ystyq tamaqpen tolyq qamtamasyz etildi.
Sonymen qatar, elge janashyr kásipker «Qyzylorda» qonaq úıiniń dırektory Q.Boranbaevtyń qoldaýymen dárigerlerge 137 oryn berilse, «Bella Vista» kesheniniń dırektory R.Ahmetov 11 orynǵa arnalǵan qonaq úıin aldyn ala usynyp otyr. Al, «Báıterek» qonaq úıiniń quryltaıshysy Jeńis Pirimov dárigerlerge 40 orynǵa arnalǵan qonaq úıin bóldi. Birlik bar jerde ár is berekeli bolary anyq. Búgingideı birtutastyǵymyz synǵa túsken ýaqytta, judyryqtaı jumylyp áreket etý mańyzdy. Sondyqtan qala turǵyndarynan karantındik talaptardy saqtap, qorǵanys maskalaryn kıip, ózara tıisti ara qashyqtyqty ustap, adamdar kóp jınalatyn jerlerge meılinshe barmaýlaryn suraımyz.
