Qyzylorda teatry Shotlandııadaǵy óner festıvaline qatysady
QYZYLORDA. QazAqparat - Qyzylorda oblystyq Nartaı Bekejanov atyndaǵy qazaq mýzykalyq drama teatry ústimizdegi jyldyń tamyz aıynda Shotlandııa astanasy Edınbýrg qalasynda ótetin «Frındj» halyqaralyq óner festıvaline qatysady, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Óner ujymy festıvalde qazaqtyń halyq jazýshysy Ǵabıt Músirepovtiń «Qozy Kórpesh-Baıan Sulý» lıro-epostyq dramasynyń jelisi boıynsha sahnalanǵan «Aqbaıan» spektaklin usynady.
Halyqaralyq «Frındj» («Fringe») festıvali 1947 jyldan bastap jyl saıyn tamyz aıynda Shotlandııa elinde ótkizilip keledi. Álemde eń joǵary deńgeıde ótetin óner festıvaliniń biri bolyp tabylady. Festıvalge álemniń 50 memleketinen 50 myńǵa jýyq ónerpaz qatysady. Olar 3 myńǵa jýyq qoıylym kórsetedi.
«Aqbaıan» spektaklin rejısser, teatrdyń kórkemdik jetekshisi, Qazaqstannyń eńbek sińirgen qaıratkeri Huseın Ámir-Temir qoıǵan. Kórkemdegen sýretshi - Nurken Qalymbetov. Spektaklde oınaıtyn artısterdiń basym kópshiligi - jastar.
Mahabbat hıkaıasyna toly elý mınýttyq qoıylymda - besikte attastyrylyp, biraq joldary ekige aıyrylǵan, on jeti jyldan soń qaıta júzdesken qos ǵashyqtyń taǵdyry sýretteledi. Bir-birin kórýge yntyq júrekter qaıta tabysady. Alaıda, olardyń qosylýyna kedergi bar. Biri - qalaıda dúnıesin toltyrýdy kózdegen qyz ákesi - Qarabaı. Ekinshisi - Baıanǵa ǵashyq, tek kúshine sengen Qodar. Spektaklde qazaqtyń ulttyq bıi oryndalyp, asyq, arqan-tartys sekildi ulttyq oıyndar oınalady. Qoıylymnyń óne boıynan qazaqtyń ulttyq naqyshtaǵy kıimderi kórinis tabady.
«Qazaqtyń ulttyq máıegi men mádenı qundylyǵy toǵysqan «Aqbaıan» spektaklimen álem sahnasyna jol tartyp, barsha qazaq óneriniń júgin arqalaǵan Nartaı Bekejanov atyndaǵy qazaq drama teatry úshin bul - úlken tarıhı qubylys jáne mártebeli mindet bolyp tabylady», - deıdi teatrdyń kórkemdik jetekshisi, Qazaqstannyń eńbek sińirgen qaıratkeri Huseın Ámir-Temir.
Sonymen qatar teatrdyń shyǵarmashylyq quramynda jastar trýppasyn, qýyrshaq toby men dramalyq ujymdy qosqanda barlyǵy 50-ge jýyq artıs qyzmet etedi. Teatr 63 jyldyq maýsymynda bes memleketke úlken gastroldik saparmen baryp, qazaq óneriniń mártebesin kóterip, mereıin asqaqtatty. Onyń ishinde, Tatarstan, Túrkııa, Ázerbaıjan jáne Ulybrıtanııa elinderinde ótken óner dodalaryna qatysyp, úlken jetistiktermen oralǵan bolatyn.
