Qyzylorda stantsııasynda joǵalǵan 3 jasar bala tabyldy
QYZYLORDA. QazAqparat - Qyzylorda stantsııasynyń kólik polıtseıleri jedel izdestirý is-sharasy nátıjesinde tabylǵan 3 jasar balanyń «Almaty-Aqtóbe» baǵytyndaǵy jolaýshylar poezdyna adamdarmen ilesip, minip ketkendigi anyqtaldy, dep habarlaıdy Kóliktegi polıtsııa departamentiniń baspasóz qyzmeti.
Baspasóz qyzmetiniń málimetterine qaraǵanda, 2017 jyly týǵan Bolat Ahmedııardyń joǵalǵandyǵy týraly Qyzylorda stantsııasynyń Jelilik polıtsııa bólimine anasy habarlaǵan.
Onyń aıtýynsha, Ahmedııar sol sátte vokzal perronynda ájesimen birge júrip, ájesi bir sátte odan kóz jazyp qalǵan.
Poez Jalaǵash stantsııasyna kelgen ýaqytta bala poezdan túsirilgen soń, anasy jetem degenshe sol stantsııadaǵy jelilik polıtsııa bólimshesiniń qyzmetkerleriniń qaraýynda bolǵan.
3 jasar Ahmedııardy kólik polıtseıleri anasyna tabystady. Bul oqıǵa týraly Ahmedııardyń anasy Indıra Tynyshtyqqyzy bylaı deıdi. «Tóbemnen jáı túskendeı boldy. Temir joldyń qaýipti aýmaq ekeni taǵy bar. Oıymyz san-saqqa ketti. Polıtseılerdiń jedel jumystarynyń arqasynda balam aman-esen, tez tabyldy. Alǵysym sheksiz. Biz úshin esten ketpes oqıǵa boldy».
Ahmedııardyń anasy Indıra izdestirýge atsalysqan qyzmetkerler ishinde polıtsııa maıory Kájdenbek Álıev pen polıtsııa serjanty Rahat Myrzabaıǵa erekshe alǵysyn bildirdi.
«Joǵalǵan balany izdeý úshin Qyzylorda stantsııasynyń jelilik polıtsııa bóliminiń jeke quramy jumyldyryldy. Polıtsııa qyzmetkerleri eleýsiz qalatyn nysandardy, adamdar kóp jınalatyn oryndardy, vokzalǵa jaqyn ǵımarattardy jáne poez vagondaryn tekserdi. Polıtseıler júrgizgen izdestirý jumystary barysynda joǵalǵan bala vagon ishinen tabylyp, aman-esen úıine oraldy. Búgingi tańda balanyń anasymen profılaktıkalyq jumystar júrgizilýde, – deıdi, Kóliktegi polıtsııa departamenti bastyǵynyń orynbasary A. G. Jumataev.
