«Qyzylorda - Shymkent - Kókshetaý» kontrafaktili ónimderdiń arnasy joıyldy
ASTANA. Naýryzdyń 10-y. QazAqparat /Jasulan Amanbaıuly/ - Naýryzdyń 2-si kúni Aqmola oblystyq ІІD jáne Kedendik baqylaý departamentiniń birlesken is-sharasy barysynda «Qyzylorda - Shymkent - Kókshetaý» baǵytyndaǵy kontrafaktili ónimderdi tasymaldaý arnasy joıyldy.
Bul týraly búgin, sársenbide ótken aptalyq brıfıngte Іshki ister mınıstrliginiń Krımınaldy polıtsııa komıtetiniń joǵary tehnologııalar salasyndaǵy qylmystar basqarmasy bastyǵynyń orynbasary Inna Petrışeva málimdedi, dep habarlaıdy QazAqparat.
Onyń atap kórsetkenindeı, Kókshetaýda ótkizilgen arnaıy jedel-izdestirý sharasy kezinde ortalyq bazarda 1500-ge jýyq kontrafaktili DVD dıskilerdi saqtaǵan Reseıdiń áıel azamaty quryqtaldy.
Polıtseılerdiń arnaıy qurǵan kombınatsııasy boıynsha 2000-ǵa tarta DVD dıskilerge tapsyrys berildi. Nátıjesinde Kókshetaý qalasyna zańsyz kontrafaktili ónimderdi jetkizýshi tulǵalar anyqtaldy. Qazirgi ýaqytta tergeý júrgizilýde.
