Qyzylorda, Shymkent, Astana jáne Óskemen qalalarynda «Qyz Jibek» klýbtary ashylmaq
ALMATY. 28 qyrkúıek. QazAqparat - Almatydaǵy Qazaq memlekettik qyzdar ýnıversıtetindegi «Qyz Jibek» klýby elimizdiń ózge aımaqtarynda da qoldaý taýyp jatyr.
Bul týraly keshe V Respýblıkalyq «Qalamger Azamat» jas tilshiler forýmyna qatysýshylar atalmysh oqý ornynda qonaqta bolǵan kezde aıtyldy. Olar atalmysh joǵary oqý ornynyń áleýmettik máseleler jáne tárbıe isi jónindegi prorektory Záýresh Sabyrovamen kezdesip, ýnıversıtet jumysymen tanysty. Odan keıin «Aqtumar» murajaıy men «Qyz Jibek» klýbynyń tynys-tirshiligimen tanysty. Z. Sabyrovanyń aıtýynsha, «Qyz Jibek» klýbynda qazaq qyzdaryna sulýlyq pen densaýlyqty saqtaýdyń, salamatty ómir súrýdiń basty qaǵıdalaryn ustanýdyń jáne bolashaq ult anasy retinde otbasy ómirine daıarlaý men úı sharýashylyǵyna qatysty ómirlik qajettilikter úıretilýde. Qyz aldyndaǵy qoǵamnyń, eldiń, ulttyń bolashaǵy úshin úlken jaýapkershiliktiń turǵandyǵy uǵyndyrylýda. Úlkendi syılaıtyn, kishige qamqor bolatyn, bilikti, bilimdi qyzdy qalyptastyrýdy maqsat tutqan «Qyz Jibek» klýby budan ózge qazaq qyzynyń boıyna ádep pen sypaıylyq, ıbalylyq, ınabattylyq, tazalyq pen adamgershilik nárin sýsyndatady. Klýb búgingi tańda stýdentterdiń syrlasatyn, oı bólisetin, qajetti keńester alatyn ornyna aınalyp otyr. Klýb tájirıbesi ıgi bastama retinde Atyraý men Kókshetaýda qoldaý tapqan edi. Jýyrda olardyń qataryna Pavlodar da qosyldy. Endi mundaı klýbtar aldaǵy jyldary Qyzylorda, Shymkent, Astana jáne Óskemende ashylmaq.
