Qyzylorda polıtsııasy joǵalǵan jasóspirimdi saıajaıdan tapty
QYZYLORDA. QazAqparat - Qyzylorda polıtsııasynyń jedel-izdestirý jumystarynyń nátıjesinde jasóspirim din aman tabylyp, otbasyna qosyldy, dep habarlady "QazAqparat" HAA tilshisi.
9 qańtarda saǵat 15.00 shamasynda 2001 jylǵy jasóspirim úıinen belgisiz baǵytqa shyǵyp ketip, qaıta oralmaıdy. Kelesi kúni anasy balasynyń joǵalyp ketkendigi jaıly polıtsııaǵa habarlaıdy. Jasóspirimdi izdeýge Jergilikti polıtsııa qyzmetiniń ıývenaldy polıtsııa bólimshesiniń jeke quramy jumyldyrylyp, jedel túrde izdestirý sharalary júrgizildi. Úıden ketip qalýyna sebep bolarlyq jaıttar jan-jaqty qaralyp, barýy múmkin oryndar tekserildi, jaqyndarynan túsiniktemeler alyndy. Polıtsııa qyzmetkerleriniń júrgizgen izdestirý sharalarynyń nátıjesinde jasóspirim «Sabalaq» saıajaıynda turatyn dosynyń úıinde tyǵylyp jatqan jerinen tabyldy.
Qazirgi tańda, jasóspirimniń jaǵdaıy jaqsy dep baǵalanýda, ol ata-anasyna tapsyryldy. Úıinen ketip qalý sebepteri anyqtalyp, mundaı jaǵdaılardyń aldyn alý baǵytynda tıisti sharalar qabyldanýda.
Osy oqıǵaǵa oraı, polıtsııa ata-analarǵa jasóspirimder tárbıesiniń, tártibiniń, minez-qulqynyń qalyptasýyna jaýapkershilikti arttyryp, jetkinshekterdiń densaýlyǵy men qaýipsizdigine baqylaýdy kúsheıtý qajettigin eskertedi.
