Qyzylorda: Polıtseıler 17 adamdy órtten qutqardy
Polıtsııa departamentiniń habarlaýynsha, Qyzylorda qalasy polıtsııa basqarmasynyń kezekshi bólimine Qorqyt ata kóshesi boıyndaǵy kóp qabatty úıdiń birinde tórtinshi qabatta ornalasqan páterden órt shyǵyp jatqany jaıynda habarlama tústi. Jedel qyzmetter mamandarymen birge polıtsııa qyzmetkerleri - Maqsat Jylqaıdarov, Maqsat Hasenov jáne Baqytjan Dosmaǵambetov oqıǵa ornyna kelip jetti.
Oqıǵa ornyna kelgen mamandar páterdiń birinen qalyń tútindi kózi shaldy. Órttiń kórshi páterlerge taralý qaýpi bar ekenin ańǵardy. Maqsat Hasenov pen Baqytjan Dosmaǵambetov órt bolǵan páterdiń esigin ashyp, onda oryn alǵan órtti sóndirýge kiristi.
Al Maqsat Jylqaıdarov ótkir tútin saldarynan páterlerinen shyǵa almaı qalǵan turǵyndarǵa kómektesti. Olardyń arasynda úlkenderdiń baqylaýynsyz qalǵan balalar da bar edi. Órt saldarynan jaryq ta sónip qalǵan bolatyn. Osyndaı qıyndyqtarǵa qaramastan polıtsııa qyzmetkerleri óz mindetterin joǵary deńgeıde atqaryp shyqty. Nátıjesinde barlyǵy 17 adam órtten qaýipsiz aımaqqa shyǵaryldy.
«Polıtsııa qyzmetkerleri óz ómirlerin qaterge tige otyryp, kóp qabatty úı turǵyndaryna kómektesti. Sol sátte turǵyndardy qutqarýǵa belsene atsalysqan Maqsat Jylqaıdarov, Maqsat Hasenov jáne Baqytjan Dosmaǵambetov syndy polıtsııa qyzmetkerleri eldiń alǵysyn aldy. Olardyń biri polıtsııa qyzmetinde on jyldan astam ýaqyttan beri qyzmet atqaryp kele jatsa, endi biri eńbek jolyn bastaǵanyna bir jyldan asqan. Olar ózderiniń batyl isterimen jas urpaqqa úlgi bola alady», - dep málim etti Qyzylorda oblystyq polıtsııa departamentiniń baspasóz qyzmeti.
