Qyzylorda ortalyǵyndaǵy atys: Bir adam aýyr jaǵdaıda
QYZYLORDA. QazAqparat - Búgin Qyzylorda qalasynyń ortalyǵynda bolǵan atys jóninde quzyrly organ basshylary shuǵyl baspasóz máslıhatyn ótkizip, oqıǵanyń jáı-japsary jaıynda baıandap berdi, dep habarlaıdy QazAqparat tilshisi.
Oqıǵa búgin, 27 qańtar kúni saǵat shamamen 14.50-de bolǵan. Kóp uzamaı oblystyq Іshki ister departamentiniń kezekshilik bólimine atys jóninde habarlama kelip túsken. Tártip saqshylarynyń iske dereý kirisýiniń nátıjesinde seziktiler qolǵa tústi.
«Qazirgi tańda atalǵan fakti boıynsha qylmystyq is qozǵaldy. Oqıǵanyń mán-jaıy anyqtalýda», - dedi oblystyq Іshki ister departamenti bastyǵynyń orynbasary Nurlan Anarbaev.
Oqıǵa ornynda aýyr jaraqat alǵan azamat saǵat 15.15 shamasynda oblystyq medıtsınalyq ortalyqqa jetkizilgen.
«Bul azamat aýyr jaraqat alǵan. Ol aýrýhananyń jansaqtaý bólimine jatqyzyldy», - dedi oblystyq medıtsına ortalyǵy dırektorynyń mindetin atqarýshy Qanat Júndabekov.
Esterińizge sala keteıik, osyǵan deıin Qyzylorda qalasynyń ortalyǵynda atys bolǵandyǵyn habarlaǵanbyz. Áleýmettik jelide atalǵan oqıǵanyń vıdeosy paıda boldy.
Ádilet Qańtarbaev
