Qyzylorda óńirinde bıyl úshinshi ret balyqshylar sleti ótedi
QYZYLORDA. QazAqparat-Shilde aıynda Syr óńirinde balyqshylar sleti ótedi. Balyq sharýashylyǵy mamandarynyń tájirıbe almasý alańyna aınalǵan shara bıyl úshinshi ret uıymdastyrylǵaly tur. Bul týraly óńirlik kommýnıkatsııalar qyzmetinde ótken baspasóz máslıhatynda oblystyq tabıǵı resýrstar jáne tabıǵatty paıdalanýdy retteý basqarmasy basshysynyń orynbasary Baýyrjan Shámenov aıtty, dep habarlady QazAqparat.
Sonymen qatar, bıylǵy jyly sý arnalaryn tazalaýǵa da úlken mán berilip otyr. Qazaly aýdanyndaǵy «Gorsovet», «Dáýlet-aryq», Jalaǵashtaǵy «Alpamys», Shıelidegi «Baısary» kanaldaryna osyndaı tazalyq jumystary júrgiziledi.
Aımaqta jylyna 8 myń tonnadan asa balyq aýlanady. Onyń aıtarlyqtaı kóp bóligi balyq óńdeý zaýyttarynda óńdelýde. Bul salanyń qarqyndy damyp, ónimderdiń eksport kólemin arttyrýǵa múmkindik berdi. Ústimizdegi jyldyń alǵashqy toqsanynda eksporttalǵan balyq ónimderiniń 65 paıyzy Reseı naryǵyna shyǵarylǵan. Sondaı-aq, Polsha, Danııa, Ázerbaıjan sekildi shetelderge de jóneltilgen.
