Qyzylorda oqýshylary Q. Kósherbaevtan mamandyq tańdaý jóninde keńes surady
QYZYLORDA. QazAqparat - Búgin Qyzylorda oblysynyń ákimi Qyrymbek Kósherbaev Prezıdenttik, Halyqaralyq, respýblıkalyq pándik olımpıada, ǵylymı joba konkýrstarynyń júldegerlerimen kezdesti. Bul týraly oblystyq ákimdiktiń baspasóz qyzmeti habarlady.
Aımaq basshysy aıtpaqshy bul oqýshylar elimizdiń asyl armany men úkili úmitteri. Rasynda kezdesýge kelgen 93 oqýshy óz qatarlastarynyń aldy bolyp, bilim básekelerinde top jaryp júrgen órender.
Bıylǵy jyly oblysymyzdyń daryndy oqýshylary Qazaqstan, Reseı, Brazılııa, Ońtústik Koreıa memleketterinde ótken Halyqaralyq olımpıadalarǵa, ǵylymı jarystarǵa qatysyp 46-sy júldeli oryndardy ıelendi. Sonyń úsheýi altyn, 8-i kúmis, qalǵany qola júlde.
Respýblıkalyq pándik olımpıadalar men ǵylymı joba konkýrstaryna, Prezıdenttik olımpıadaǵa qatysyp 22 oqýshy jeńimpaz atandy (Altyn medal - 3, kúmis medal - 5, qola medal - 14).
Bıylǵy jyly halyqaralyq, respýblıkalyq olımpıadalar men ǵylymı jarystarǵa qatysqan oqýshylardyń 57-i UBT-den bosatyldy. Byltyrǵy oqý jylynda Sankt-Peterbýrg memlekettik ósimdik polımerleri tehnologııalyq ýnıversıteti, Máskeý ulttyq tehnologııalyq zertteý ýnıversıtetterinde oblysymyzdyń 107 balasy Reseı federatsııasy bıýdjeti esebinen oqytylyp jatsa, oblys ákiminiń granty boıynsha 240 bala bilimderin shyńdaýda.
Al bıyl Sankt-Peterbýrg memlekettik ósimdik polımerleri tehnologııalyq ýnıversıtetine emtıhan tapsyrǵandarynyń ishinde 64 oqýshy, K.A.Tımırıazev atyndaǵy Reseı memlekettik agrarlyq ýnıversıtetine 115 oqýshy oqý grantyn ıelenýge múmkindik alsa, Reseı Federatsııasy Máskeý qalasyndaǵy ulttyq tehnologııalyq zertteý ýnıversıtetine 200 oqýshy, Reseı Federatsııasy Prezıdenti janyndaǵy sharýashylyq jáne memlekettik basqarý akademııasyna 30 oqýshy oqý grantyna jáne 7 oqýshy magıstratýra men aspırantýraǵa oqýǵa múmkindik alyp otyr.
«Munyń bári - oblys kóleminde daryndy balalarǵa degen qamqorlyqtyń jáne Sizderdiń, ustazdaryńyz ben ata-analaryńyzdyń eńbekteriniń jemisi dep bilemin. Elimizdiń ǵylymı áleýetin kóterip, halyqaralyq deńgeıde Qazaq eliniń ǵylymdaǵy mereıin asqaqtata dep senim bildiremin. Qazaqta «Bilekti - birdi, bilimdi - myńdy jyǵar» degen ataly sóz bar. Búgingi kúni, Sizder, sol ataly ustanymnyń údesinen shyǵyp, túrli bilim básekelerinde qatarlaryńyzdan oza shaýyp, el abyroıyn asqaqtatýyna shyn júrekten tilektespin», - dedi oblys ákimi Q.Kósherbaev.
Jalpy, kezdesý erkin formatta ótti. Oqýshylar aımaq basshysyna kókeılerinde júrgen suraqtaryn qoıdy. Tipti óńirdiń damýyna baılanysty qandaı mamandyq tańdaý qajet dep keńes te surady. Barlyq saýaldy oblys basshysy jaýapsyz qaldyrǵan joq. Oqýshylar óner de kórsetti.
Kezdesý sońynda barlyq oqýshyǵa arnaıy syılyqtar tabys etildi.
