Qyzylorda oblysynyń jańa shaǵyn aýdanynda mektep qurylysy bastaldy
QYZYLORDA. QazAqparat - Búgin Qyzylorda oblysynyń ákimi Gúlshara Ábdiqalyqova «Báıterek» turǵyn aýdanyndaǵy 600 oryndyq mekteptiń qurylys jumystarymen tanysyp, jańa mekteptiń kirpishin qalaý jumystaryna atsalysty. Sharaǵa QR Parlamenti Májilisiniń depýtattary Balaıym Kesebaeva men Natalıa Jumadildaeva qatysty.
Mektep qurylysynyń jumysyn kórgen oblys ákimi bilim oshaǵynyń zamanaýı túrde iske asyp, oqýshylardyń ıgiligine baǵyttalýy qajettigin atap ótti.
Tórt jyl buryn Qyzylorda-Jezqazǵan trassasynyń boıynan 6600 otbasyna arnalǵan «Báıterek» shaǵyn móltek aýdany ashylǵan bolatyn. Búginde onda 70 otbasy qonystansa, atalǵan otbasylardyń mektep jasyndaǵy oqýshylary qala ortalyǵyndaǵy mektepterge qatynap bilim alýda. Osyǵan oraı 600 oryndyq mekteptiń qurylysyn salýda jobalyq-smetalyq qujattarǵa sáıkes jumystar bastalyp ketti.
Mektep 2020-2021 jyldarǵa arnalǵan Jumyspen qamtýdyń jol kartasy aıasynda iske asýda. Bilim oshaǵyn salýǵa 1,2 mlrd teńge qarjy bólingen. Jańa mektep jyl aıaǵyna deıin paıdalanýǵa berilmek.
Aldaǵy 3 jyldyń josparyna sáıkes, «Báıterek» shaǵyn móltek aýdanynda mektep jasyndaǵy oqýshylar sany 1500-ge jýyqtaıdy. Jańa mektep oryn tapshylyǵy máselesin sheshedi.
Іs-shara barysynda bilim salasynyń ardageri Myltyqbaı Baımbetov: «Jańa bilim uıasy elge belgili azamattardyń túlep ushatyn ozyq oqý ordasyna aınalady», - dep bata berdi.
Aıta keteıik, qazirgi tańda oblysta 8 mekteptiń qurylysy júrgizilýde. Oqý jylyna Qyzylorda qalasynan jáne Jalaǵash aýdanynan 2 mektep qurylysy paıdalanýǵa beriledi dep josparlanýda. Sonymen qatar, 4 mekteptiń qurylysy júrgizilýde. Onyń ishinde Aral aýdany, Sekseýil kentindegi 300 oryndyq mektep jyl sońynda aıaqtalmaq.
