Qyzylorda oblysynyń turǵyny kóligimen Aral teńizine batyp ketti
Tótenshe jaǵdaılar qyzmetine 10 qańtar saǵat 11.48-de habar tústi.
Onda Aral aýdanyna qarasty Aqespe eldi mekeninen 20-25 shaqyrym jerde ornalasqan Shómishkól balyq aýlaý ýchaskesindegi Kishi Aral teńizine Aral qalasynda turatyn 1963 jylǵy azamat ÝAZ avtokóligimen batyp ketkeni aıtylǵan.
«Aral aýdany Qamystybas eldi mekenindegi jedel-qutqarý jasaǵy bólimshesinen 4 qutqarýshy úrlemeli motorly qaıyq jáne 3 jıyntyq súńgýir qural-jabdyǵymen oqıǵa ornyna jetti. Oqıǵa orny teńiz jaǵasynan shamamen 7 shaqyrymdaı jerde. Muz qalyńdyǵy shamamen 35 sm bolsa, sý tereńdigi - 14 metr. Aýa raıynyń qolaısyzdyǵynan izdestirý jumystary 11 qańtar kúni bastaldy. Qutqarýshylar 14 metr tereńdikten ÝAZ avtokóligin tapty. Alaıda kólik ishinde sýǵa ketken adam joq ekeni belgili boldy», - dedi Qyzylorda oblystyq tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Vedomstvo málimetinshe, jedel qutqarý jasaǵynyń súńgýirleri izdeý jumysyn jalǵastyryp jatyr.
Olarǵa kómek retinde Qyzylorda qalasynan KAMAZ kóligimen 5 qutqarýshy, Shymkent qalasynyń 2 qutqarýshy jumyldyryldy.
Atalǵan mamandar sý asty izdestirý jumystaryna arnalǵan «eholot» quralymen qamtamasyz etilgen. Sýǵa batyp ketken adamnyń denesi búgin saǵat 12.03-te tabyldy.
Eske salsaq, budan buryn Aralǵa balyq aýlaýǵa shyǵyp joǵalyp ketken 2 adam tabyldy.
