Qyzylorda oblysynyń Syrdarııa aýdanynda blokpost qoıyldy ma

QYZYLORDA. QazAqparat - Qyzylorda oblysy Syrdarııa aýdanynda blokpost qoıylǵan joq. Bul jóninde oblys ákimdiginiń baspasóz qyzmeti málimdeme jasady, dep habarlaıdy QazAqparat tilshisi.

Ótken kúnderi WhatsApp áleýmettik jelisi arqyly turǵyndar arasynda «Syrdarııa aýdanynda blok-beket qoıyldy» degen aqparattar taralǵan bolatyn.

Syrdarııa aýdany 14 sáýir kúni koronavırýs boıynsha «qyzyl» aımaqqa engen bolatyn. Osyǵan oraı aýdandyq sanıtarııalyq-epıdemıologııalyq baqylaý basqarmasy basshysynyń mindetin atqarýshy Q.Omarovanyń №1 Qaýlysy shyqty.

«Qaýlyda birqatar shekteý sharalary engizildi. Degenmen, Syrdarııa aýdanynda blokpostar qoıylǵan joq. Al, túrli jeliler arqyly taraǵan fotosýrette «Tereń-ózek ken orny» dep kórsetilgen. Alaıda, bul Kaspıı mańy oıysynyń ońtústik-shyǵys erneýi mańyndaǵy Tereńózek munaı-ken ornyna qatysty. Sondyqtan «Syrdarııa aýdanynda blokpost qoıyldy» degen aqparattyń jalǵan ekenin habarlaımyz», - dep jazylǵan oblys ákimdiginiń baspasóz qyzmeti taratqan habarlamada.