Qyzylorda oblysynyń memqyzmetshileri úsh tilde synǵa tústi
QYZYLORDA. QazAqparat-Qyzylordada úshtildilikti nasıhattaý, úsh tildi - qazaq, orys jáne aǵylshyn tilderin jetik meńgergen memlekettik qyzmetshilerdi anyqtap, olardy qoldaý maqsatynda «Til sheberi -2017» oblystyq baıqaýy ótti, dep habarlaıdy QazAqparat tilshisi.
Baıqaýǵa oblystyq basqarmalar men departamentterde jumys jasaıtyn 21 men 29 jas aralyǵyndaǵy jas memlekettik qyzmetshiler qatysty. Olar baıqaýdyń «Mádenıettanym» dep atalatyn bóliginde qazaq halqynyń salt-dástúri, dili men tili jónindegi suraqtarǵa qazaq tilinde jaýap berse, «Ulttanym» bóliginde qazaq eli tarıhy men uly tulǵalary, elimizdiń aımaqtary jónindegi suraqtarǵa orys, aǵylshyn tilderinde aıtýy tıis boldy. Al, úshinshi - «Ónertanym» kezeńinde úsh tilde berilgen jańyltpashty 3 ret aıtýdan synǵa tústi.
Talapkerlerdiń bilimin Qorqyt Ata atyndaǵy Qyzylorda memlekettik ýnıversıtetiniń dotsenti, fılologııa ǵylymdarynyń kandıdaty Aman Abasılov basqarǵan qazylar alqasy baǵalady.
Baıqaý sarapshylary úmitkerlerdiń ónerin baǵalaý kezinde olardyń tilderdi meńgerý deńgeıine, jaýaptyń oramdylyǵy men sapasyna, mazmundylyǵy men ereksheligine, úsh tilde orfoepııalyq turǵydan taza sóıleýine, sahnalyq mádenıetine, kıimine basa nazar aýdardy.
Báseke qorytyndysy boıynsha Qyzylorda oblysynyń mádenıet, arhıvter jáne qujattama basqarmasynyń bas mamany Q. Balmaǵambetov І oryndy jeńip alsa, Qyzylorda oblysynyń Statıstıka departamentiniń mamany A. Alımbetova ІІ oryndy, Qyzylorda oblysynyń memlekettik sáýlet-qurylys baqylaý basqarmasynyń bas mamany M. Álip ІІІ oryndy ıelendi.
Sondaı-aq, Qyzylorda oblysynyń mádenıet, arhıvter jáne qujattama basqarmasynyń bas mamany F. Halılýllaev, Qyzylorda oblysynyń Statıstıka departamentiniń mamany Z. Sultanova, Qyzylorda oblysy boıynsha Qylmystyq-atqarý júıesi departamentiniń esep tehnıgi Q. Pazylov yntalandyrý syılyqtaryn aldy.
Baıqaý jeńimpazdary Qyzylorda oblystyq ishki saıasat basqarmasynyń dıplomdarymen jáne baǵaly syılyqtarymen marapattaldy.
Oblystyq baıqaýdyń jeńimpazy Qazaqstan halqy tilderiniń merekesine oraı ótetin respýblıkalyq baıqaýǵa qatysýǵa joldama aldy.
Shara uıymdastyrýshylary - Qyzylorda oblystyq ishki saıasat basqarmasy jáne «Medıa-Press» qoǵamdyq qory.
