Qyzylorda oblysynyń kúrishine oraq tústi
QYZYLORDA. QazAqparat - Shıeli aýdanynda 2017 jyldyń kúrish oraǵy bastaldy, dep habarlady QazAqparat tilshisi.
Iirkól aýyldyq okrýgine qarasty «Altyn Dán - Shıeli» sharýa qojalyǵynyń alqabynda bastalǵan bul dala dúbiri úlken saltanatpen atalyp ótti. Aýdan ákimi Qaıratbek Sársenbaev úlken naýqandy sapaly ári qysqa merzimde ótkizý jóninde habarlama jasasa, Parlament Senatynyń depýtaty Murat Baqtııaruly quttyqtaý sóz sóıledi.
Ybyraı Jaqaev aýylyndaǵy «Altyn Dán - Shıeli» sharýa qojalyǵy bul kúnderi aýdandaǵy irgeli sharýashylyqtyń birine aınalyp úlgerdi. Jas maman Asqar Berdibaev basshylyq jasaıtyn sharýashylyq aýyldaǵy birneshe usaq sharýashylyqtyń basyn biriktirip, birlese jumys jasaýdyń tıimdiligin dáleldedi. Nátıjesi de jaman emes, ótken jyly aýdan «chempıony» atandy. Al bıyl olar jalpy 1230 gektar jerge egin ekse, onyń 900 gektary - Syr marjany.
Sharýashylyq basshysynyń málimdeýinshe, ortasha ár gektardan 60 tsentnerden ónim alýǵa múmkinshilik bar kórinedi. Agrotehnıkalyq sharalar ýaqytyly ótkizilip, daqyl dárejesinde kútimge alynǵan.
Bıyl Shıeli aýdany jalpy 30 myń gektar egin ekse, onyń ishinde kúrish daqyly 13352 gektarǵa jetkizildi. Bul ótken jylmen salystyrǵanda 2 myń gektarǵa artyq. Sondaı-aq kókónis, baqsha daqyldary men ekpeli shóp kólemi de molaıdy.
«Elbasy tapsyrmasyna oraı oblys ákimi Qyrymbek Eleýulynyń tikeleı qadaǵalaýymen jańa saǵa basynan úrlemeli sý qoımasy ornalastyryldy. Memleket qarjysyna salynǵan mańyzdy nysan óz tıimdiligin dáleldep úlgerdi. Máselen, darııada sý kólemi azaısa da, jańa qurylǵy arqyly Shıeli aýdanynyń alqaptary burynǵydaı sýdan tapshylyq kórmeıdi», - dedi aýdan ákimi Qaıratbek Sársenbaev.
