Qyzylorda oblysynyń ımamdary Joldaýǵa qoldaý bildirdi

      QYZYLORDA. QazAqparat- Qyzylorda oblysyndaǵy barlyq qalalyq, aýdandyq jáne aýyldyq meshitterdiń ımamdary bas qosyp, Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyn talqylady, dep habarlady QazAqparat HAA tilshisi.

Qazaqstan musylmandary dinı basqarmasynyń Qyzylorda oblysy boıynsha ókildigi uıymdastyrǵan sharaǵa sondaı-aq «Aqmeshit-Syrdarııa» ortalyq meshitiniń bas ımamy Talǵat Omarov, oblystyq ishki saıasat basqarmasynyń din isteri bóliminiń mamany Ersultan Esov, «Din máselelerin zertteý ortalyǵy» KMM dırektorynyń orynbasary Maralbek Musaev qatysty.

Qatysýshylar Qazaqstan Prezıdenti Joldaýynyń negizgi maqsaty men basymdyqty baǵyttaryn talqylady. Ásirese, dinı ekstremızmdi nasıhattaýdyń aldyn alý boıynsha máseleler talqylandy. Nursultan Nazarbaev: «Qoǵamda, ásirese, dinı qarym-qatynas salasyndaǵy radıkaldy kózqarasqa baılanysty kez kelgen áreketke «múlde tózbeýshilikti» qalyptastyrý kerek. Bas bostandyǵynan aıyrý oryndarynda sottalǵandardy teologııalyq turǵydan saýattandyrý qyzmetteriniń maqsatty jumysy uıymdastyrylýǵa tıis. Óskeleń urpaqty rýhanı-adamgershilik rýhynda tárbıeleý úshin qosymsha qadamdar jasaý kerek», - dep atap ótken bolatyn.