Qyzylorda oblysynyń aýyl sharýashylyǵy ónimderi Iranǵa eksporttalady
QYZYLORDA. QazAqparat - Sáýir aıynda oblystyq aýyl sharýashylyǵy basqarmasy basshysy Baqyt Jahanov bastaǵan óńirimizdiń iri sharýa qojalyqtarynyń basshylary men ókilderinen quralǵan Qyzylorda oblysynyń delegatsııasy Iran Islam Respýblıkasynyń Gúlistan jáne Mazandaran provıntsııalaryna jumys saparymen baryp qaıtty. Bul týraly QazAqparat HAA tilshisi oblystyq aýylsharýashylyq basqarmasyna silteme jasap habarlady.
Sapar barysynda Gúlistan provıntsııasy Aýyl sharýashylyǵy, Balyq sharýashylyǵy, Ónerkásip, saýda jáne taý-ken uıymdary, Saýda, ónerkásip, taý-ken jáne aýyl sharýashylyǵy palatasy basshylarymen kezdesýi ótti.
Kezdesýde Gorgan Saýda, ónerkásip, taý-ken jáne aýyl sharýashylyǵy palatasynyń Prezıdenti Ramezan Bahramı, Gúlistan provıntsııasy Aýyl sharýashylyǵy uıymy basshysy Mohtar Mohadjer, Ónerkásip, saýda jáne taý-ken uıymy basshysynyń orynbasary Darvısh Alı Hassanzade jáne t.b jaýapty tulǵalar óz salalary boıynsha provıntsııanyń ekonomıkalyq áleýeti men ınvestıtsııalyq múmkindikterimen tanystyrdy.
Gúlistan provıntsııasynyń basshylyǵy provıntsııanyń Qyzylorda oblysymen ekonomıkalyq qurylymy jaǵynan uqsastyǵyna nazar aýdaryp, Qyzylorda oblysynda aýyl sharýashylyq daqyldaryn egý, balyq jáne mal ósirý, osy salalardaǵy ozyq tehnologııamen almasý, Qazaqstanǵa jemis-jıdek ónimderin eksporttaý, Qyzylorda oblysynan tiri mal, maıly daqyldar ımporttaý jáne t.b. máselelerde ózara yntymaqtastyq jasaýǵa daıyn ekendigin atap ótti.
Oblystyq delegatsııa óz tarapynan ekijaqty qarym-qatynasty ońtaıly jáne ózara tıimdi damytý boıynsha ırandyq áriptesterimen tyǵyz baılanys ornatýǵa daıyn ekendigin jetkizip, Iranǵa iri qara, usaq maldy, onyń etterin jáne «Novator» sorty kúrish jarmasyn eksportqa, Qyzylorda oblysy aýmaǵynda salynatyn et kombınatynyń qurylysyn ırandyq tehnologııamen birlesip salý jáne onyń bolashaq ónimderin Iran, Parsy shyǵanaǵy memleketterine eksporttaý, ırandyq kúrishtiń sorttaryn Qyzylorda oblysynda ósirý jáne ony Iranǵa eksporttaý máselelerin usyndy.
Dál osyndaı kezdesý Sarı qalasynda Mazandaran Saýda, ónerkásip, taý-ken jáne aýyl sharýashylyǵy palatasynyń Prezıdenti Abdalla Mohadjerdarabı, Aýyl sharýashylyǵy uıymynyń basshysy Delavar Heıdarpýr, Ónerkásip, saýda jáne taý-ken uıymynyń basshysy Omran Mohammadpýr, Investıtsııa tartý jáne qoldaý departamentiniń dırektory Leıla Vosýgı jáne t.b. jaýapty qyzmetkerlermen de júrgizildi.
Gúlistan provıntsııasynyń jeke kásipkerlerimen B2B formatynda kezdesý ótkizildi. Atalǵan kezdesý aıasynda Gúlistan provıntsııasynyń gýbernatory Hasan Sadeglýmen kezdesip, eki óńir arasyndaǵy ekonomıkalyq yntymaqtastyqty damytý jáne jandandyrý máseleleri talqylandy. Provıntsııa gýbernatory Qyzylorda oblysymen qatynastardy nyǵaıtýǵa erekshe mán beretinin atap ótti.
Atalǵan B2B formatyndaǵy kezdesýge Qazaqstan Respýblıkasymen saýda-ekonomıkalyq jáne ınvestıtsııalyq yntymaqtastyq ornatýǵa, iri qara men usaq mal, et satyp alý, mal jáne balyq sharýashylyǵy, aýyl sharýashylyǵy daqyldaryn egý jáne qaıta óńdeý salalarynda Qazaqstanǵa ınvestıtsııa salýǵa qyzyǵýshylyq tanytýshy 30-dan astam kompanııalardyń ókilderi qatysty.
Kezdesý barysynda Gúlistan provıntsııasyndaǵy mal etin soıý jáne satýmen aınalysatyn iri kásiporynnyń biri «Eros Co» kompanııasynyń ókili R.Ahmadı Qyzylorda oblysynda et kombınatynyń qurylysyna birlesip ınvestıtsııa salýdy jáne onyń bolashaq ónimderin Iranǵa, Parsy shyǵanaǵy elderine eksportqa shyǵarýdy usyndy.
Sonymen birge, Gúlistan provıntsııasynyń «Maragatape» kooperatıv basshysy M.Garabımen kezdesýinde qazaqstandyq «Novator» kúrishiniń jarmasyn Iran naryǵyna eksporttaý máselesi talqylanyp, kúrishtiń úlgisi usynyldy.
Qyzylorda oblysy delegatsııasynyń Gúlistan provıntsııasy basshylyǵymen jáne kásipkerlerimen júrgizgen kelissózderiniń nátıjesinde taraptar Qyzylorda oblysy Aýyl sharýashylyǵy basqarmasy jáne Gúlistan provıntsııasy Aýyl sharaýashylyǵy uıymynyń ózara yntymaqtastyq jónindegi memorandýmǵa qol qoıdy.
Jalpy issapar barysynda ırandyqtar Qyzylorda oblysynyń kásipkerlerimen tyǵyz baılanysta jumys jasaýǵa, Iranǵa kúrish, et, tiri mal ónimderin jetkizýge úlken qyzyǵýshylyq bildirip, Iran Islam Respýblıkasynyń aýyl sharýashylyǵy salasyndaǵy birneshe iri kompanııa ókilderi oblysymyzǵa is-saparmen kelýi josparlanýda.
