Qyzylorda oblysynyń aýdandary «Qala kúnine» tartýlar jasamaqshy
QYZYLORDA. 29 tamyz. QazAqparat - Qyzylorda oblysynyń aýdandary «Qala kúnine» qyzylordalyqtarǵa tartý jasamaqshy. Bul týraly qala ákimdiginde ótken turaqty keńeste qala ákiminiń orynbasary Rýslan Rústemov habarlady.
«Qyzylorda qalasynda 14 qyrkúıek pen 11 qazan aralyǵynda «Qala kúni» merekesi ótkiziledi dep josparlanýda. Aıta ketý kerek, bıylǵy jyldyń ereksheligi qala qabyrǵasynyń qalanǵanyna 195 jyl tolýymen erekshe. Osy rette R. Rústemov oblysqa qarasty aýdandar qalalyqtarǵa tartý retinde skverler salyp berip, abattandyrýǵa úles qosatyndyǵyn jetkizdi. Ol úshin arnaıy oryndar berilip, jumystar júrgizilýde», - delingen habarlamada.
Sonymen birge, qalanyń kórkemdik-estetıkalyq sánin, kelbetin jaqsartý baǵytynda Jibek joly kóshesi boıyna arnaıy jasandy «gúl kompozıtsııasy» qoıylyp, elektr baǵandaryna 600 dana gúl sharlary ornatyldy. Osyndaı túrli shynaıy zattarǵa uqsas jasandy kompozıtsııalardy qalanyń birneshe aımaǵyna qoıý jóninde eskızdik usynys ázirlenip, jumystar júrgizilýde.
Qalanyń túngi jaryqtandyrý jumystarynda da jańa qondyrǵy qurylǵylar iske qosylatyn bolady. Ortalyq kóshelerdegi 25 arkalyq qondyrǵylar qaıta jóndeýden ótkizilip, fleks-neon shamdary arqyly ulttyq oıý-órnekte beınelenýde.
Keńes barysynda qala ákimi Nurlybek Nálibaev tıisti sala basshylaryna merekege daıyndyqty joǵary deńgeıde uıymdastyrýdy, qalalyqtarǵa tartý, abattandyrý jumystaryn sapaly júrgizýdi tapsyrdy.
