Qyzylorda oblysynyń ákimi Syr óńiri turǵyndaryn Jańa jylmen quttyqtady
ASTANA. QazAqparat - Qyzylorda oblysynyń ákimi Q.Kósherbaev jerlesterin jańa jylmen quttyqtap, Syr óńirindegi jetistikterde árqaısysynyń úlesi bar ekendigin atap ótip rızashylyǵyn bildirdi.
«Qurmetti jerlester! Barshańyzdy jaqyndap qalǵan, jańa - 2016 jylmen shyn júrekten quttyqtaımyn!
Jańa jyl - qaı halyqtyń da zor qýanyshpen asyǵa kútetin mereıli merekesi.
Jańa jyl - ótkendi saralaıtyn, keleshekke baǵdar jasap, erteńge batyl josparlar qurylyp, úlken mindetter júkteletin ýaqyt.
Ótken 2015 jyl syrttan kelgen daǵdarystyń saldaryna qaramastan, Syr eli úshin jetistikteri mol, tabysy zor jyl boldy.
Birinshiden, kásiporyndaǵy qyzmetkerlerdiń jappaı qysqarýyna jol bermedik, jalpy sany 11 myńnan asa jańa jumys ornyn qurdyq. Halqymyzdy eńbekpen, ıaǵnı turaqty tabyspen qamtamasyz etý biz úshin eń mańyzdy mindet bolyp qala beredi.
Ekinshiden, halqymyzdyń áleýmettik jaǵdaıyna tikeleı áser etetin birqatar iri ınfraqurylymdyq jobalar qarqyndy túrde iske asa bastady:
Oblysty gazdandyrý jobasynyń aıasynda Aral, Áıteke bı, Baıqońyr, Shıeli jáne Jańaqorǵan eldi mekenderine kógildir otyn jetti;
Qyzylorda qalasy jer astynan shyǵatyn taza aýyz sýǵa kóshti;
Óńirdegi qurylys buryn-sońdy bolmaǵan qarqynmen damýda. Oblystaǵy qurylys kólemi 3 jarym ese, al Qyzylorda qalasyndaǵy qurylys kólemi 8 ese ósti. Sonyń arqasynda tek oblys ortalyǵynda búgin 2 jarym myńǵa tarta otbasy Jańa jyldy jańa páterde qarsy alady.
Óńdeý ónerkásibi 4 jarym ese ósti, aýyl sharýashylyǵynyń barlyq salasynda ósý baıqalady, kásipkerlik damýda, áleýmettik salada, ásirese bilim berýde jaqsy nátıjelerge qol jetkizdik. Mádenı muraǵa tıisti qamqorlyq jasalýda.
Tize bersek, osyndaı jetistikterimiz kóp-aq. Syr eliniń bul tabystarynda árqaısyńyzdyń jeke úlesterińiz bar. Sondyqtan osy múmkindikti paıdalanyp, barshańyzǵa jasaǵan jasampaz eńbekterińiz ben elge degen janashyr nıetterińiz úshin rızashylyq bildiremiz.
Dúnıeniń túkpir-túkpirinde dinaralyq tartys, azamattyq soǵys, saıası dúrbeleń kúsheıip, ǵalamdyq ekonomıka álsiregen qazirgideı ýaqytta bizdiń birligimiz artýy erekshe qajet. Ysyraptan aýlaq bolyp, yntymaqty eńbekke den qoıýymyz kerek. Halqymyzdyń otanshyldyǵy, bir-birine degen meırimi, úlkenniń kishige degen qamqorlyǵy, álsizge degen janashyrlyqtyń tanylatyn kezeńi keldi.
Ardaqty aǵaıyn!
Jańa jylda Sizderge ıgilik pen izgilik,denderińizge saýlyq shańyraqtaryńyzǵa baq pen bereke tileımin!
Táýelsiz Qazaqstanymyzdyń tuǵyry qashan da berik, týy bıik bolsyn! Kıeli Syr eliniń quty men yrzyǵy arta bergeı!
Jańa jyl qutty bolsyn, qurmetti jerlester!» delingen ákimniń quttyqtaýynda.
