Qyzylorda oblysynyń ákimi shahmatshy qyzǵa 250 myń teńge syılady
QYZYLORDA. QazAqparat. Qyzylorda oblysynyń ákimi Qyrymbek Kósherbaev shahmattan oqýshylar arasyndaǵy álem chempıony, FIDE sheberi Nazerke Nurǵalımen kezdesti, dep habarlaıdy QazAqparat tilshisi.
Júzdesý barysynda aımaq basshysy jas shahmatshy men onyń bapkeri Vasılıı Shımelkovqa aldaǵy saıystarda jeńis tiledi. Sondaı-aq, oǵan 250 myń teńgeniń sertıfıkaty tabys etildi. Esterińizge sala keteıik, 2018 jyldyń 20-29 sáýiri kúnderi Albanııanyń Dýrres qalasynda ótken álem chempıonatynda Nazerke Nurǵalı 15 jasqa deıingi oqýshylar arasynda jeńimpaz boldy.
«Bul meniń halyqaralyq baıqaýdaǵy alǵashqy altyn medalim, odan buryn bıyl Taılandta ótken Azııa chempıonatynda jáne 2017 jylǵy Rýmynııadaǵy álem chempıonatynda kúmis medaldardy jeńip alǵan edim. Oblys basshylyǵyna sportsmenderdi únemi qoldap, aımaǵymyzda shahmat oıynyn damytyp jatqany úshin alǵys bildiremin», - dedi Nazerke Nurǵalı.
Ústimizdegi jyldyń tamyz aıynda Nazerke Mońǵolııada jalaýyn kóteretin Azııa chempıonatynda, qyrkúıekte Túrkııada bolatyn álem chempıonatynda (20 jasqa deıingi qyzdar arasynda) baq synaıdy. Al qazan aıynda ony Grekııadaǵy álem birinshiligi (14 jasqa deıingi shahmatshylar) kútip tur.
