Qyzylorda oblysynyń ákimi polıtseılerge 69 avtokólik kiltin tabystady
QYZYLORDA. QazAqparat - Búgin 21 maýsymda Qazaqstan polıtsııasynyń 25 jyldyǵyna oraı Qyzylorda oblysynyń ákimi Qyrymbek Kósherbaevtyń qatysýymen Ortalyq alańda, ıaǵnı Oblystyq sot ǵımaratynyń janynda ornalasqan stantsıonarly polıtsııa beketiniń ashylý saltanaty boldy, dep habarlady QazAqparat.
Bıyldyń ózinde jergilikti bıýdjet esebinen Qyzylorda oblysy Іshki ister departamentiniń Jergilikti polıtsııa qyzmetine qarjy bólinip, 69 avtokólik, statsıonarlyq polıtsııa beketin ornalastyrý úshin modýl tárizdi úı-jaı satyp alyndy.
Jańa polıtsııa beketi qazirgi zamanǵa saı erekshe úlgide salynǵan (Reseı Federatsııasynyń Samara qalasynyń tájirıbesi negizinde) jáne jobasy Jergilikti atqarýshy jáne prokýratýra organdarymen birlesip ázirlengen. Polıtseılerge barlyq jaǵdaı jasalǵan, qajetti jabdyqtarmen, kompıýter, beınekameralarmen jáne ІІM-niń arnaıy bazasymen jabdyqtalǵan. Osyǵan uqsas 13 beket qalanyń ózge da aýmaqtarynda ashylmaq.
Sondaı-aq, saltanatty shara barysynda sap túzegen qyzylordalyq polıtseılerge «Toyota Corolla» markaly 69 avtokóliktiń kilti tabys etildi. Avtokólikter jol-patrýldik polıtsııa batalonyna paıdalanýǵa berilmek. Bul atalǵan bólinis qyzmetiniń jedeldigin arttyrýǵa jáne oblystaǵy qoǵamdyq tártipti qamtamasyz etýge eleýli septigin tıgizedi.
Aımaq basshysy kez kelgen aımaqtyń damý deńgeıi onyń qoǵamdyq tártibiniń turaqtylyǵymen jáne azamattardyń quqyǵyn qamtamasyz etýimen anyqtalatynyn basa kórsetti. Jergilikti ákimdik tarapynan bul baǵyttaǵy el Prezıdentiniń tapsyrmasy tolyqtaı oryndalyp jatqandyǵyn jáne organdardyń mártebesin arttyrý baǵytynda biraz sharýa atqarylǵanyn jetkizdi. Búgingi kórsetilgen qoldaý olardyń halyq aldyndaǵy mindetterin esh kedergisiz, adal oryndaýlaryna oń áserin tıgizetinine senim bildirdi.
