Qyzylorda oblysynyń ákimi eńbekten bereke tapqan úlgili otbasylarmen kezdesti
«Otbasy kúni» aıasynda búgin oblys ákimi Nurlybek Nálibaev «Altyn toı» ıelerimen kezdesip, iltıpat bildirdi., dep habarlaıdy QazAqparat Qyzylorda oblysy ákiminiń baspasóz qyzmetine silteme jasap.
Qurmet tórine shaqyrylǵandar qatarynda eńbektiń arqasynda abyroı bıigine kóterilgen qarapaıym jumysshy, qurylysshy, dıhan, saýynshy, mehanızator áýletteri bar. Olardyń kóbisi 10-nan asa bala tárbıelep, nemere, shóbere súıgen kıeli shańyraq ıeleri.
Merekelik is-sharaǵa oblystyq máslıhat hatshysy Naýryzbaı Baıqadamov, qoǵamdyq keńes tóraǵasy Árip Qojbanov pen sala basshylary qatysty.
Aımaq basshysy qazaq halqy úshin otbasy uǵymy qashannan qasıetti de kıeli ekeni atap ótip, sanaly urpaq tárbıeleýde úlgili otbasy men parasatty ata-ananyń róli erekshe ekenin jetkizdi.
«Dana halqymyzda «Otan – otbasynan bastalady» degen keremet sóz bar. Óıtkeni, Otandy súıýge tárbıeleıtin birden-bir orta ol – otbasy. Otbasynda jarasym, súıispenshilik, meıirim bolsa ǵana shańyraq bıik qurylyp, keregesi keń bolyp, tútini túzý ushady.
El Prezıdenti Qasym-Jomart Kemeluly Toqaev osy jylǵy Joldaýynda otbasyn qorǵaý jáne bala kapıtalyn qalyptastyrýǵa erekshe mán berdi. Mundaı qoldaý árbir qazaqstandyqtyń óz bolashaǵyna degen senimin nyǵaıta túsetini sózsiz. Al osyndaı halyq ıgiligine baǵyttalǵan shynaıy sheshimderdiń el arasynda durys qabyldanýynda Sizderdiń pikirlerińiz zor mańyzǵa ıe», - dedi N.Nálibaev.
Oblys ákimi ónegeli otbasylardy nasıhattaý maqsatynda Qyzylordada «Analar úıi» salynatynyn málimdedi.
Oblystyq máslıhat hatshysy Naýryzbaı Baıqadamov berekeli shańyraq ıelerin «Otbasy kúnimen» quttyqtap, otbasylyq qundylyqtar qaı kezde de qundy ári ózgermeıtinin tilge tıek etti.
Jıynda 7 bala, 20 nemere, 5 shóbere tárbıelegen úlgili áke Faızýlla Sahıev pen 8 bala, 22 nemere, 8 shóbere tárbıelegen batyr ana, «Eńbekte úzdik shyqqany úshin» medaliniń jáne «Kúmis alqa» ıegeri, saýynshy Razııa Appazova sóz alyp, aımaq basshysyna alǵys bildirdi.
Erkin pikir almasý barysynda saltanatty kesh qonaqtary otbasy ónegesi, bala tárbıesi men jastarǵa ulttyq qundylyqtardy darytý máselesin tilge tıek etti.
Іs-shara sońynda «Altyn toı» ıelerine jergilikti ónerpazdar jyrdan shashý shashyp, áýlettiń analaryna syı-qurmet kórsetildi.
Aıta keteıik, óńirde sońǵy úsh jylda bala týý kórsetkishi 16 paıyzǵa artty.
Búginde Syr óńirinde 141 myńnan asa otbasy bar. Onyń ishinde 48 myńnan astamy kópbalaly otbasylar. Al, 17 myńǵa jýyq ana «Altyn alqa» men «Kúmis alqa» ıegeri atanǵan.
