Qyzylorda oblysynyń ákimi birinshi jartyjyldyqty qorytyndylady
QYZYLORDA. QazAqparat - Qyzylorda oblysynda áleýmettik-ekonomıkalyq damýdyń barlyq kórsetkishteri boıynsha, munaı óndirý men óndiris kólemin eseptemegende ósim qamtamasyz etildi.
Bul týraly oblystyq máslıhattyń sessııasynda Qyzylorda oblysynyń ákimi Qyrymbek Kósherbaev málimdedi, dep habarlady QazAqparat.
" Jalpy alǵanda, jyldyń birinshi jartysynda áleýmettik-ekonomıkalyq damýdyń barlyq kórsetkishteri boıynsha oń ósim qamtamasyz etildi. Munaı óndirý kórsetkishin jáne sáıkesinshe, ónerkásip óndirisiniń kólemin qospaǵanda. Biraq, bul jerde obektıvti sebep bar - munaı óndirý kóleminiń tabıǵı tómendeýi. Bul ózderińizge belgili. Ókinishke qaraı, bul kórsetkishke biz eshqandaı áser ete almaımyz. 2017 jyl boljamy - 6,8 mln tonna, 2016 jylǵa qaraǵanda 840 myń tonnaǵa az, al, 4 jyl burynǵy kórsetkishten 4,2 mln tonnaǵa tómendegen. Bul, kórshiles Aqtóbe oblysynyń jyldyq munaı óndirý kólemine sáıkes. Aǵymdaǵy jyl basynan biz 450 myń tonnany ala almadyq. Jaǵdaı munaıdyń turaqsyz, tómen baǵasyna qatysty kúrdelenýde",- dedi oblys ákimi.
Ákimniń aıtýynsha, shyǵynnyń kólemi men munaı salasynyń ekonomıkaǵa yqpalyn elimizdiń Ulttyq qoryna túsetin túsimderge qarap-aq paıymdaýǵa bolady. 2013 jyldyń ózinde memleket qazynasyna Qyzylorda oblysynan 500 mlrd teńge aýdarylǵan bolsa, al, bıylǵy jyl basynan bar bolǵany - 58 mlrd teńge.
Osyǵan baılanysty aımaq basshylyǵy Úkimetten jańa ken oryndaryn barlaý quqyǵyn beretin kelisimsharttardyń merzimderin uzartý, eksportqa shyǵarylatyn munaı kólemin arttyrý máselelerin tezdetip qaraýdy suraǵan bolatyn. Sondaı-aq, óńirdegi ýran óndirý kólemin qysqartpaý máselesi de qoıyldy.
Aıta ketý kerek, Qyzylorda oblysynda munaı qorynyń azaıýyna baılanysty shıkizatqa táýeldilikten arylyp, qurylys kólemin arttyrý jáne jańa óndiris oryndaryn ashý maqsatynda óńir ekonomıkasyn ártaraptandyrýdy kózdeıtin 2020 jylǵa deıingi damý baǵdarlamasy ázirlendi. Aımaq óńdeý ónerkásibiniń damýy boıynsha respýblıkada aldyńǵy qatarda, bul oblys ekonomıkasyndaǵy qurylymdyq ózgerister men ártaraptandyrýdyń qarqynyn kórsetedi. Mundaı qarqyndy damý ınvestıtsııa tartý, qurylys, AÓK damytý jáne áleýmettik salada da bar.
Aıta ketsek, búgin Qyzylorda oblysynda oblystyq máslıhattyń HІV sessııasy ótip, onda oblys ákimi Qyrymbek Kósherbaev aımaqtyń birinshi jartyjyldyqtaǵy áleýmettik-ekonomıkalyq damý qorytyndysy týraly baıandady.
