Qyzylorda oblysynyń ákimi balalarǵa jańa avtobýstar men lagerge joldama syılady
Parkte búldirshinderge merekelik kóńil-kúı syılaý úshin «Men baqytty balamyn» mýzykalyq bı kompozıtsııasy men dron-shoý uıymdastyrylǵan, arnaıy fotoaýmaq jasaqtalǵan.
«Biz el bolashaǵy – bilikti de bilimdi urpaq qalyptastyrýda barlyq múmkindikterge jol ashamyz. Memleket basshysy Qasym-Jomart Kemeluly Toqaev 2022 jyldy Balalar jyly dep jarııalaǵany belgili. Ataýly jylda syrboıylyq balalardyń ıgiligi úshin 80 sport-oıyn alańy paıdalanýǵa berildi. Sonymen qatar Jalaǵash aýdanynda 200 orynǵa arnalǵan Oqýshylar úıi, 50 oryndyq Óner mektebi ashyldy. Osy kezge deıin qalamyzda bir ǵana Oqýshylar úıi bolsa, bıyl sol jaǵalaýdan «QazGerMunaı» kompanııasynyń demeýshiligimen 350 orynǵa arnalǵan zamanaýı úlgidegi Oqýshylar saraıynyń qurylysy bastaldy. Memleket basshysynyń qoldaýymen «Jaıly mektep» ulttyq jobasy aıasynda aldaǵy 3 jylda bizdiń óńirde 15 100 orynǵa arnalǵan quny 100 mlrd. teńgeden asatyn 21 zamanaýı mektep qurylysy júrgiziledi. Bıyl 10 mekteptiń qurylysy bastalady, onyń 5-eýi oblys ortalyǵynan salynady. Osy joba aıasynda apatty mektepter máselesi sheshiledi», – dedi aımaq basshysy.
Aıta keteıik, úsh aýysym máselesin sheshý úshin qaladaǵy 4 mektepke qosymsha ǵımarattar salynýda. Bul bastama nátıjesinde 5000-ǵa jýyq oryn tapshylyǵy joıylmaq.
Qazir ınvestorlardyń óz qarajaty esebinen salynǵan jeke mektepter jelisi 24-ke jetti. Aldaǵy jyldary taǵy 8 jeke mektep ashý josparlanýda. Sonymen qatar jyl sońyna deıin Syr óńirinde 5 jańa mektep oqýshylar ıgiligine tabystalady.
Jýyrda Qyzylorda qalasy «Sabalaq» eldi mekeninde daryndy balalarǵa arnalǵan 150 oryndyq mektep-lıtseı-ınternaty paıdalanýǵa berilse, dál osyndaı 150 oryndyq mektep-ınternat jańa oqý jylynda Qarmaqshy aýdanynda ashylady.
Úkimet basshysynyń Syr eline sapary kezinde 300 oryndyq jataqhanasy bar 400 orynǵa arnalǵan «Fızıka-matematıka» baǵytyndaǵy mektep-ınternat salý jobasy qoldaý taýyp, búginde mektep qurylysy bastaldy. Taǵy bir jańalyq, aldaǵy 3 jylda 64 balabaqsha ashý josparlanýda.
Іs-shara barysynda aımaq basshysy olımpıada jáne ǵylymı joba jeńimpazdaryn marapattady. Bilim berý uıymdaryna 9 jańa avtobýstyń kiltin jáne balalarǵa lagerge joldama men BILIMBOOK qurylǵylaryn tabystady.
Aıta keteıik, aımaqta búginnen bastap tamyz aıyna deıin «Qazaqstan – baqytty balalyq mekeni» taqyrybynda aptalyqtar óte bastaıdy. Búldirshinderge arnalǵan mádenı-rýhanı, sporttyq, zııatkerlik is-sharalarmen birge qaıyrymdylyq aktsııalary uıymdastyrylmaq.
Bıyl 400-ge jýyq syrboıylyq óren halyqaralyq, respýblıkalyq dárejedegi ǵylymı jobalar men olımpıadalardyń, sport týrnırleriniń jáne óner konkýrstarynyń jeńimpazdary men laýreattary atandy. Laıyqty qoldaýdyń nátıjesinde Syr órenderi bilim básekelerinde top jaryp, aımaq abyroıyn eseleýde. Atap aıtar bolsaq, jalpy bilim beretin pánder boıynsha respýblıkalyq olımpıadada komandalyq esepte oqýshylarymyz jaratylystaný baǵytynda ІІ, al gýmanıtarlyq pánder boıynsha ІІІ oryndy ıemdendi. Bul – óte jaqsy kórsetkish. Budan bólek, 4 jáne 9-synyp oqýshylary arasyndaǵy bilim jetistikterin baǵalaý monıtorıngi boıynsha óńirimiz respýblıkada úzdik úshtiktiń qataryna endi. Jazǵy demalys kezinde 1 - 10 synyp oqýshylarynyń 98 paıyzy jazǵy tynyǵý lagerlerimen, ár túrli saýyqtyrý, jumyspen qamtý, úıirme, ekskýrsııamen qamtylady.
Aımaǵymyzda búgingi kúni 280 myńǵa jýyq bala bar. Oblystaǵy 686 mektepke deıingi uıymda 60 myńnan astam bala tárbıelenýde. «Bilimdi ult» ulttyq jobasy aıasynda 2-6 jastaǵy búldirshinderdiń 88,8%-y, al 3-6 jas aralyǵyndaǵy balalar 100% balabaqshamen qamtylǵan. Jyl basynan qazirge deıin 1 561 oryndyq 13 jeke balabaqsha balalarǵa esigin aıqara ashty.
