Qyzylorda oblysynyń ákimi ardager jýrnalıstke avtokólik syılady
QAZALY. QazAqparat - Aral aýdanynda KSRO-nyń eńbek sińirgen mádenıet qaıratkeri, Qazaqstan Jýrnalıster odaǵynyń múshesi Shákirat Dármaǵambetovtiń 90 jyldyǵyna arnalǵan merekelik is-sharalar ótti, dep habarlaıdy QazAqparat tilshisi.
Qyzylorda oblysynyń ákimi Qyrymbek Kósherbaev Aral aýdanyna jumys sapary barysynda saltanatty sharaǵa qatysyp, mereıtoı ıesin quttyqtady.
«Syr ólkesi arǵy-bergi tarıhymyzda shyǵarmashylyqpen aınalysatyn talantty aqyn-jazýshylardan, jyrshy, qalamgerlerden kende emes. Solardyń biri - talantty týyndylarymen-aq tuǵyrly tulǵaǵa aınalǵan, qalamy qarymdy, oıy alymdy, jýrnalıstıka salasynda ózindik qoltańbasy, óshpesteı izi bar, aqparattyń abyzy Shákirat Dármaǵambetov aǵamyz. Soǵys bastalǵanda 12-13 jastar shamasyndaǵy bala bolsa da, «Eńbek armııasyna» ketken ákesiniń aý-quralyna ıe bolyp, teńizden balyq aýlady. Pedınstıtýtty bitirgennen keıin mektepte, partııa komıtetinde jáne aýdandyq, oblystyq gazetterdiń redaktsııalarynda jumys istedi. Búginde aýdannan shyqqan qalamgerler, jýrnalıster kóshin toqsanǵa kelse de tuǵyrdan túspegen Shákirat aǵamyz bastap tur», - dedi óńir basshysy.
Óńir jýrnalıstıkasyna kóp jyl eńbek sińirgen Sh.Dármaǵambetovke oblys ákimi «Nıva» avtokóliginiń kiltin tabystady. Sondaı-aq, ardagerdiń keýdesine QR Aqparat jáne kommýnıkatsııalar mınıstrliginiń «Aqparat salasynyń úzdigi» tósbelgisin taqty.
Sondaı-aq mereıtoı ıesin áriptesteri men zamandastary, Qazaq SSR-niń Balyq sharýashylyǵy mınıstri bolǵan Qudaıbergen Sarjanov pen aýdandyq ardagerler keńesiniń tóraǵasy Kishkene Aıbosynov quttyqtady.
Óz kezeginde Sh.Dármaǵambetov áriptesterine rııasyz kóńilderi úshin alǵysyn bildirdi.
Aıta keteıik, Shákirat Dármaǵanbetov 1950 jyly Qyzylordadaǵy pedagogıkalyq ınstıtýttyń tarıh fakýltetin támamdaǵannan keıin Oqý mınıstrliginen Gýrev (Atyraý) oblysyna jumysqa joldama berildi. Atyraýdan soń Aral aýdanynyń Shómishkól, Oktıabr, Qaratereń mektepterinde dırektor, kolhozda partkom hatshysy, aýdandyq partııa komıtetiniń uıymdastyrý bóliminde nusqaýshy, 1960 jyldyń aqpan aıynan Aral aýdandyq «Sotsıalıstik Aral», Qazaly aýdanynda «Lenın týy» gazetterinde bólim meńgerýshisi jáne redaktordyń orynbasary qyzmetterin atqardy. 1966 jyldyń naýryz aıynan bastap oblystyq «Lenın joly» gazetiniń Aral-Qazaly aýdandaryndaǵy menshikti tilshisi bolady. Ol óz mindetin 25 jyl minsiz atqardy.
