Qyzylorda oblysynyń ákimi Aqlaq pen Kókaral sý tospalarynyń jumysymen tanysty
ARAL. QazAqparat - Qyzylorda oblysynyń ákimi Qýanyshbek Ysqaqov Aral aýdanyna jumys sapary barysynda Aqlaq jáne Kókaral sý tospalarynyń jumysymen tanysyp, balyq óńdeý kásiporyndarynyń qyzmetkerlerimen kezdesti, dep habarlaıdy QazAqparat óńir basshysynyń baspasóz qyzmetine silteme jasap.
Aqlaq sý tospasy 2006 jyly paıdalanýǵa berilgen bolatyn. Qazirgi tańda sý tospasy Syrdarııa ózeninen kelip jatqan sýdy Aqlaq sý tospasyna deıingi ornalasqan kólderge, shabyndyqtarǵa, kanaldar arqyly jiberý úshin paıdalanylýda.
Al, Kókaral sý tospasy 2005 jyldyń qarasha aıynda paıdalanýǵa berildi. Sý tospasyn salý nátıjesinde teńizdiń qurǵaǵan ultanyn aýdany 870 sharshy metrdi quraıtyn sý basty. Teńizdegi sýdyń kólemi 11,5 tekshe metrge ulǵaıdy, al sýdyń mıneraldylyǵy 23-ten 17 g/l deıin azaıdy.
Búgingi tańda teńizde 24 balyq túri kezdesedi, onyń 13 túri balyq túri jaqyn jáne alys shet elderge eksporttalýda.
Ótken jyldyń sońynda atalmysh ónim túrleri Qytaıǵa eksporttala bastady.
Sonymen qatar, óńirde jyldyq qýaty 11 myń tonnadan asatyn 8 balyq óńdeý zaýyty turaqty jumys istep tur. Onyń ishinde 2 zaýyt evrokodqa ıe boldy. Búgin paıdalanýǵa berilgen «Jalǵasbaı» JShS zaýyty - aımaqtaǵy 9-balyq óńdeıtin kásiporyn.
Aıta ketý kerek, sońǵy bes jylda óńirdegi balyq eksportynyń kólemi 9 esege artty. Oblys balyq óndirý jáne óńdeý kólemi boıynsha 3-oryn alady.
Esterińizge sala keteıik, Qyzylorda oblysynyń 2019-2022 jyldarǵa arnalǵan áleýmettik-ekonomıkalyq damýynyń keshendi josparynda ekologııa jáne tabıǵatty paıdalaný salasyndaǵy birqatar jobalardy júzege asyrý, sonyń ishinde Kókaral bógetin saqtaý jáne Syrdarııa ózeniniń arnasyn qalpyna keltirý jónindegi is-sharalar da qarastyrylǵan.
Sondaı-aq, keshendi jospar aıasynda Qyzylorda sý torabyn jóndeý kózdelgen. Sonyń nátıjesinde onyń apattylyq problemasy sheshiledi. Atalmysh jospar aıasynda «Kúmisketken» men «Qaraózek» sý qoımalarynyń da qurylysy júrgiziletin bolady.
