Qyzylorda oblysynyń 100 myńǵa jýyq arhıvti qujaty sandyq formatqa aýystyrylýda
QYZYLORDA. QazAqparat- Búgingi kúnge deıin Qyzylorda oblysynyń arhıvinde saqtalǵan 96 myń 917 qujattyń 10 mln.ǵa jýyq paraǵy sandyq formatqa kóshirilip, saqtandyrý qorlary jasaldy. Tsıfrlyq júıege birinshi kezekte qundy qujattar aýystyrylýda.
Bul týraly búgin Óńirlik kommýnıkatsııalar qyzmetinde ótken baspasóz máslıhatynda oblystyq mádenıet, muraǵattaý jáne qujattama basqarmasynyń basshysy Erjan Ábdirahmanov aıtty, dep habarlady QazAqparat HAA tilshisi.
Qazir oblys boıynsha ólketaný baǵytyndaǵy 3343 kitap, 1941-1969 jyldary basylyp shyqqan «Lenın joly», «Pýt Lenına» gazetteri tsıfrlyq formatqa kóshirilgen.
Sonymen qatar, jańa tehnologııalardy paıdalaný maqsatynda aldaǵy ýaqytta teatr, fılarmonııa, oblystyq tarıhı-ólketaný murajaıynyń bıletteri onlaın-rejimde satylmaq.
Erjan Ahmetulynyń aıtýynsha, mádenıet salasynda bıylǵa josparlanǵan sharalar EKSPO-2017 halyqaralyq kórmesi men Memlekettik rámizderdiń 25 jyldyǵyna, taıaý jáne alys sheteldermen dıplomatııalyq qarym-qatynastyń 25 jyldyǵyna arnalyp otyr.
«Osy jyldyń 10-16 sáýiri aralyǵynda Qyzylorda oblysynyń Ázerbaıjan Respýblıkasyndaǵy mádenıet jáne óner kúnderi aıasynda Baký jáne Shekı qalalaryna gastroldik sapar uıymdastyrylady. Oǵan oblystyq teatr jáne fılarmonııanyń shyǵarmashylyq ujymdary qatysyp, óner kórsetedi. Sondaı-aq, Astana qalasynda EKSPO-2017 halyqaralyq kórmesi aıasynda Qyzylorda oblysynyń óner kúnderi ótedi dep josparlanýda», - deıdi basqarma basshysy.
