Qyzylorda oblysyndaǵy tikushaq apaty: Úsh adamnyń máıiti tabyldy
NUR-SULTAN. QazAqparat - Qyzylorda oblysyndaǵy Mı-8 tikushaǵy apatqa ushyraǵan orynnan úsh adamnyń máıiti tabyldy, dep habarlaıdy QazAqparat Densaýlyq saqtaý mınıstrliginiń baspasóz qyzmetine silteme jasap.
«Oqıǵa ornynan úsh máıit tabyldy. Olardyń kim ekeni áli aıqyndalǵan joq. Tikushaqtyń qaldyqtary 500 metr jerden tabyldy», - delingen Qyzylorda oblysynyń Densaýlyq saqtaý basqarmasynyń habarlamasynda.
Eske sala ketsek, QR ІІM TJK baspasóz qyzmeti buǵan deıin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Qorǵanys mınıstrliginiń habarlaýynsha, atalmysh tikushaq 4 birdeı áskerı tikushaq quramynan turatyn bólimmen birge Aqtaý qalasynan Shymkentke ushyp bara jatqan. Ushý sapary arnaıy bólimshelerdiń «Altyn jebe» keshendi oqý jáne jattyǵý aıasynda qarańǵy ýaqytta ári kúrdeli meteorologııalyq jaǵdaıda júrgizilgen.
«Qorǵanys mınıstri Nurlan Ermekbaevtyń buıryǵymen apat ornyna arnaıy qurylǵan QR Qorǵanys mınıstrliginiń komıssııa jiberildi. Qazirgi ýaqytta tórt tikushaqtyń ekeýi Qyzylorda qalasyna qondy. Al qalǵan bir tikushaq oqıǵa ornyna qaıta oraldy. Qorǵanys mınıstrligi Іshki ister mınıstrligimen birlesip, bolǵan áýe apatynyń sebebin anyqtaý maqsatynda tergeý jumystaryn júrgizip jatyr», - delingen mınıstrliktiń habarlamasynda.
