Qyzylorda oblysyndaǵy sý tapshylyǵynyń sebebi belgili boldy
Qazirgi tańda oblysqa qarasty eldimekenderge 61 nasos qondyrǵysy jetkizilip, 26 uńǵymanyń burǵylanýy men 14 kanaldy tazalaý jumysy aıaqtaldy.
Bul jóninde óńirlik kommýnıkatsııalar qyzmetinde ótken brıfıngte oblystyq tabıǵı resýrstar jáne tabıǵat paıdalanýdy retteý basqarmasynyń basshysy Marat Qurmanbaev málimdedi.
- Sońǵy jyldary Syrdarııa ózenindegi sý aǵynynyń azaıýy óńirdiń ekologııalyq jáne áleýmettik-ekonomıkalyq jaǵdaıyna edáýir áserin tıgizip otyr. Bul kólderdiń qurǵaýyna, kúrish egisiniń azaıýyna, tabıǵı mal azyǵynyń tómendeýine ákeledi. Osyǵan baılanysty bıyl jalpy uzyndyǵy 1 034 shaqyrymdy quraıtyn 162 kanaldy tazalaý, 156 nasos qondyrǵy satyp alý, 87 uńǵymany jóndeý jáne burǵylaý, 322 gıdrotehnıkalyq qurylysty jóndeý jumysy júrgiziledi. Qazirgi ýaqytta 7 kanal tolyq tazalanyp bitti, - dedi basqarma basshysy M.Qurmanbaev.
Qazirgi tańda Shardara sý qoımasyna sekýndyna 83 tekshe metr sý túsip jatyr. Al Shardara ózeniniń tómengi aǵysyna 550 tekshe metr sý tastalýda.
Qyzylorda oblysy shekarasynan Kóktóbe sý beketi arqyly sekýndyna 551 tekshe metr sý ótedi.
- Qazirgi jınaqtalǵan sýdyń kólemine baılanysty esepteý júrgizildi. Byltyr Syrdarııa ózeninde sýdyń az bolýy aýyl sharýashylyǵy salasy men jeke sharýalarǵa keri áserin tıgizdi. Sol sebepti sý tapshylyǵynyń aldyn alý maqsatynda Shardarada 500 mln tekshe metr sý artyq jınaldy, - deıdi Aral-Syrdarııa ınspektsııasynyń bólim basshysy S.Abýov.
- Oblysta egis alqaptaryndaǵy sý tapshylyǵynyń negizgi sebebi – bıik jerlerge egin egý. Bul óz kezeginde egis kóleminiń azaıýyna ákelip soqtyrady. Búginde jiberilgen sý kólemi Qyzylorda sý torabyna kelip, birinshi kezekte sý tapshylyǵy bar Qazaly, Qarmaqshy jáne Jalaǵash aýdandaryna jiberildi, - dedi Qazsýshar RMK Qyzylorda oblystyq fılıaly dırektorynyń orynbasary J.Ernazarov.
