Qyzylorda oblysyndaǵy avtobýs apaty: Eljan Birtanov zardap shekkenderdiń jaǵdaıyn aıtty
«Aýyr jaraqattanǵan 6 adam oblystyq aýrýhanaǵa jetkizildi. 16-sy ortasha deńgeıde, 7-teýi jeńil-jelpi jaraqattanǵan. Respýblıkalyq shuǵyl medıtsınalyq kómek ortalyǵy tarapynan qoldaý kórsetilip jatyr, sanıtarlyq avıatsııa brıgadasy da bardy», - dedi mınıstr Úkimet otyrysynan keıin BAQ ókilderine.
Sonymen qatar ol qazirgi ýaqytta zardap shekken barlyq azamatqa qajetti medıtsınalyq kómek kórsetilip jatqanyn basa aıtty.
«Jaǵdaıdy monıtorıngilep otyrmyz. Eger patsıentterdi barynsha joǵary tehnologııalyq ortalyqtarǵa jetkizý qajettigi týyndaıtyn bolsa, onda biz oǵan da daıynbyz», - dedi Eljan Birtanov.
Buǵan deıin QR ІІM Ákimshilik polıtsııa komıteti tóraǵasynyń orynbasary Janat Ábdirahmanov 8 adam ajal qushqan «Qyzylorda-Qumkól» jolyndaǵy apat jaıynda málimettermen bóliskenin habarlaǵan edik.
Al Qyzylorda oblysy densaýlyq saqtaý basqarmasy basshysynyń orynbasary Oljas Ysqaqovtyń aıtýynsha, jaraqat alǵan 21 adam oblystyq jáne qalalyq aýrýhanalarǵa jatqyzylǵan.
«Oqıǵa ornynda barlyǵy 7 jedel járdem kóligimen dárigerler jumys istedi. Sanıtarlyq avıatsııa jelisi paıdalanyldy. Jaraqat alǵan 21 adam oblystyq medıtsına ortalyǵy men qalalyq aýrýhanaǵa jatqyzyldy. Onyń ishinde 17-i oblystyq medıtsına ortalyǵynda em qabyldap jatyr. Onyń 5-eýi jansaqtaý bólimine ornalastyryldy. Al qalalyq aýrýhanaǵa jetkizilgen 4 naýqastyń 1-eýi jansaqtaý bóliminde. Olarǵa barlyq tıisti emdeý sharalary jasalýda»,- dedi ol.